2019年4月29日
上周五,阿Man跟幾個老友飯敍,當中有會計師、律師各上市公司董事,席間4人有一個共通點,都係喺金融圈內搵飯食嘅金融圈人。幾個老友由於各有各忙,已一段時間無見面,難得飯敍,當然天南地北乜都吹得一餐。城中熱話之一,《逃犯條例修訂草案》當然亦係席間話題。
既然係關於法律問題,阿Man當然要向司法界嘅律師朋友取經,問下《逃犯條例》修訂後,究竟會有幾大鑊。
做生意易中地雷
老友實話實說,指雖然已有建議剔出9項商業罪行,但餘下嘅37項類別,都係好易會誤中地雷,「上面有心要搞你,容乜易搵到個位」。就好似當中第15項罪行,類別「與賄賂、貪污、秘密佣金及違反信託義務有關的法律所訂的罪行」,真係話咁易會出事,例如唔少香港人喺內地做生意,要做掛名董事,分分鐘違反咗信託義務仲懵盛盛唔知乜事。
呢個時候,估唔到並非法律界嘅上市公司董事老友都發表意見,話佢唔少老友喺內地都有個「紅顏知己」,直接啲講係小三或二、三、四五奶,而《逃犯條例》第39項,「與婦女及女童有關的罪行」修例一旦通過,都唔知幾多港商會中招。
本來阿Man對《逃犯條例》只係略知皮毛,唔係老友提到呢條第39項,真係唔知包咗個二奶都可能出事。
至於做會計嘅老友就話,只要內地出一句聲,指有人逃稅、經濟犯罪、陰陽合約,嗰位被指犯咗相關罪行嘅「犯」,就要被引渡返內地審訊,民主派激烈反對修例,就係怕異見人士被入上述罪行而要引渡大陸受審。
民主派上街遊行發聲,而住喺香港四季匯服務式住宅(被稱為「望北樓」)的一眾視香港為避風塘嘅內地富豪,同樣用對腳去發表對修例嘅意見,但就唔係上街遊行,而係逃離香港。
望北樓之所以叫望北樓,就係住喺嗰度嘅內地富豪,大部分都係受內地打貪所影響。由於相熟嘅地方官員涉貪腐,或被雙規、或被開除黨籍,甚至判刑踎監,生怕可能捲入某個貪腐案,一收到風即倉皇逃避至香港,並希望有朝一日等到自己可能涉及嘅案件雨過天青,能大步檻過而安全回歸,喺香港過渡期間,北望神州,所以稱之為望北樓。
袋鼠國近年吃香
《逃犯條例》促使一眾內地商家逃走兼逃錢,考慮離開香港,喺修例通過前,先逃離香港,遠走到佢哋認為更安全嘅地方,免成為被引渡對象。
過往花旗國跟米字旗國一直係內地有錢佬認為安全嘅地方,即使再愛國嘅商人,再忠黨嘅高官,自己人在內地,子女都會選擇到英美兩地留學,唔少畢業之後亦唔會返中國。
不過米字旗國脫歐搞到一鑊泡,錢留喺嗰度未必安全,而中美貿易戰雙方博弈影響之下,人留喺花旗國亦唔安全,隨時變咗華為太子女咁款,成為雙方博弈嘅籌碼,所以現時內地富豪離開香港,優先選擇嘅係去袋鼠國。
講到呢度,當晚我哋4個飯敍分子都無晒心機,一旦望北樓嘅用家一窩蜂走人,對已經愈嚟愈難搵食嘅金融市場,簡直係雪上加霜。不過,正如金融圈嘅老前輩潮州詹話齋,「你反對都無用,浪費精神!」縱使再多嘅反對聲音,政府仍要一意孤行,修例後硬要納入司法制度跟香港完全唔對嘅中國大陸,以後就只有踩住地雷過日子。
麥狄文(徐狄怡.證監會持牌人 滙盈資產管理.董事總經理)
訂戶登入
下一篇: | 尊重彈性修例 對付電腦犯罪 |
上一篇: | 完「殼」歸「主」 |