熱門:

2019年3月15日

畢老林 投資者日記

硬跌軟升冇仲好

3月14日,周四。英國脫歐單嘢,要正正經經分析真係人都癲。「文姨」方案連哀兩次,離脫歐只有十幾日。冇協議就得硬脫歐本來順理成章,但臨場加演兩幕國會表決戲碼,議員先就是否同意硬脫歐表態,繼而投票決定是否要求延遲脫歐。冇協議又怕硬脫歐英國頂唔順,脫乜鬼歐?英國佬到底想點連自己都搞唔清楚,旁人又點拆得掂?

戲爛都要做

執筆一刻,延遲脫歐表決仲未開show,但英國財相夏文達就話,若然英國政府尋求推遲脫歐限期,歐盟可能堅持大幅延長。正路諗,押後脫歐要得到歐盟27國同意,主動權在EU手上,英國要𠼮契爺咁𠼮,但得唔得要睇對方是否願意通融。可是,按照夏文達講法,歐盟好像慌死英國三個月搞唔掂,索性畀夠一年甚至更長,好讓你慢慢走出迷宮未遲。

歐盟就是這樣,不論姿態擺得多高,到頭來講同做往往是兩回事。希臘講脫離歐羅區都講咗好耐,最終還不是繼續留在Eurozone同EU?

英國脫歐由頭到尾鬧劇一場,但鑼鼓已起獅頭已舞,場戲幾爛都要做落去。Brexit其實係畀班炒家攞嚟挾上挾落嘅話題,佢哋唔會理什麼Irish backstop、customs union;說到脫歐,硬跌軟升冇仲好,七個字講晒。

吹開大不列顛,不能不談英鎊。講英鎊,怎能不提大鱷索羅斯?叫得大鱷,食嘅自然係大茶飯,做嘅當然係大世界。不過,對老索來說,股滙債只是達到目的嘅工具,他真正要衝擊的是建制(establishment)。這樣說好像很理想主義,但索羅斯親口講過,金融市場是他發揮政治影響力的平台,要引起公眾注意,沒有任何事比一晚狂賺10億美元更有效。當然,大鱷不是每單trade都為了政治目的而做,純為錢的相信更多,可是有資格說出上述那番話,捨the man who broke the Bank of England其誰?

所謂物先腐而後蟲生,若非歐洲國家經濟步調不一、政策要求不同,索羅斯哪來可乘之機,向不堪一擊的歐洲滙率機制(ERM)埋手?當年英鎊退出ERM跟今天英國脫歐各有前因,不能混為一談,惟勉強冇幸福這句話,不論放諸大不列顛與歐洲大陸,抑或「歐豬」跟德國,大家話係咪一樣咁正確?歷史嘅嘢,不斷重演而已。

魔鬼定聖人

講番老索嗰筆,上世紀九十年代初,大鱷早已賺個盤滿缽滿,可是身家豐厚的他,自覺政治影響力薄弱得與財富不成正比;要改變這個局面,索羅斯認為必須建立一個「平台」,讓自己成為公眾人物。

老索1997年上過《時代》雜誌封面,在那一期中,大鱷暢談1992年沽空英鎊的威水史。據他自言,炒英鎊「脫歐」(ERM)乃刻意為之,目的是建立一個令自己無人不識的平台。(I deliberately did the sterling thing to create a platform. Obviously people care about the man who made a lot of money.)

英倫銀行都鬥得垮,想唔識你都難。然而,從英鎊到亞洲貨幣,老索靠在金融市場食大茶飯增加個人政治影響力,哪怕世人視他為魔鬼,自覺像救世主feel good就夠。

話得說回頭,唔理係撒旦定係聖人,單槍匹馬KO中央銀行,咁嘅故仔隔幾代都那麼富傳奇色彩,索羅斯的豪氣點到你唔服?

歷史贏家寫

不過講開又講,老畢聽過好多次,沽空英鎊這個意念並非出自老索本人,而係源於當時他的「頭馬」德魯肯米勒(Stanley Druckenmiller),索羅斯只係嫌佢做得唔夠大,沽得未夠狠,極力主張睇準就要All-in而已。德魯肯米勒自己亦講過,他從索羅斯身上學到最寶貴的一件事,就係有信心唔怕甚至必須落重注,所舉實例正是Short鎊。

沿此路進,1992年沽鎊乃德魯肯米勒「自把自為」的倉盤,索羅斯起初未必知情,搞清楚後才鼓勵「頭馬」瞓身。除非德魯肯米勒跟老細志同道合,彼此都有遠大政治抱負,否則唔為錢為乜?可是,聽了索羅斯同《時代》講的那番話,成件事好像是他早有預謀,滿腦子金錢以外的盤算,德魯肯米勒頂多只是負責操盤的打手。究竟誰的版本更符合事實,抑或德魯肯米勒沽鎊令索羅斯靈機一觸,想到利用此戰建立他口中的「平台」?

歷史由贏家寫成,哪種說法才真恐怕永遠是一個謎。

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads