2019年1月14日
港交所(00388)舊年底歡天喜地宣布港股喺2018年重奪新股集資額全球冠軍之位,但港股每日平均成交額卻愈玩愈縮,所以有關港股每日交投量喺世界各大市場中排名卻噤若寒蟬,隻字不提,主要係排名根本唔高,更被紐交所及倫交所遠遠拋離。港股更有一個相當奇怪嘅現象,窩輪牛熊證佔每日成交額閒閒地兩成,原因係衍生工具係免收印花稅,交易成本較低,對於投資者嚟講更吸引。
查實全球主要股票市場,大部分都不設印花稅,即使內地股市,亦只係沽貨時要畀印花稅,但港股係買賣都要畀印花稅,稅率為每宗交易金額嘅0.1%,比例實在高到得人驚。
反而近日見港股喺ADR嘅成交似乎愈玩愈活,若果以股數計算,ADR交投佔相關股份喺香港市場嘅成交比例,由過往兩三成,到依家增加至七八成,主要係美國嗰邊唔收印花稅之餘,唔少卜架為咗搶生意推出優惠,確係吸引唔少港股嘅「煙出挑唇」投資者客仔。
繼2017年證券業界向政府提出檢討股票印花稅後,近日又再舊事重提,可惜政府喺庫房盈餘滿滿之際,仍然無意調整股票印花稅,卜架都怨聲載道,尤其係啲中小型卜架就最重怨氣,甚至把要求降低,由全免印花稅改為收單邊印花稅都收貨,可惜政府就係企硬,一於少理。
查實阿Man認為,即使政府就範肯減免印花稅,或者可以吸引「煙出挑唇」投資者多啲喺港股進行交易,甚至係做埋高頻交易,不過得益嘅都始終係大行,對於中小型經紀嚟講,唔會多咗幾多着數,但偏偏最落力去游說政府嘅就係中小型卜架,反而大型卜架同A組經紀,未見積極做說客。出現咁嘅情況,阿Man又唔覺得有幾奇怪,皆因唔少二三線卜架一直係幾大鬼子佬或內地大行嘅打手,一向有接大行嘅盤,倘減免印花稅,大行多咗高頻交易,同樣可以惠及二三線卜架。
窒礙黑池高頻交易
不過政府企硬唔肯調整股票印花稅,其中一個考慮係話減免印花稅,係就係會增加短線交易數量,當然有助提振整體成交額,對港交所固然有利,但對港股市場發展未必好事,高頻交易增加,或導致港股走勢更波動。
查實衍生工具唔需要繳付印花稅,咁多缸邊友炒輪、炒牛熊,衍生工具波幅大,屬高風險投機活動,難道咁又係對市場整體發展係好事?
作為全球五大股票市場之一,由於交易成本高昂嘅問題,令港股喺亞太區主要市場當中成為「換手率」最低嘅市場之一,減免印花稅有助推動用以量度流通程度的「換手率」。
而股票印花稅亦窒礙黑池交易、高頻交易及細價股交易,口痕友話近兩年監管機構不斷收緊條例,進一步扼殺細價股嘅生存空間,減唔減印花稅,細價股未來嘅路都係愈嚟愈難行。
麥狄文(徐狄怡.證監會持牌人)
訂戶登入
下一篇: | 通縮威脅隱現 貨幣政策趨鬆 |
上一篇: | 具中國特色頒獎禮 |