熱門:

2018年11月22日

畢老林 投資者日記

倉爆咗喊都嘥眼淚

11月21日,周三。每逢股市大起大落,總會聽到不同類型衍生工具爆大鑊的消息。遠的不說,單以今年為例,年初美股發生小型股災,導致恐慌指數VIX的反向產品XIV「爆廠」關閉,搞到追蹤/造淡波動率的交易策略潰不成軍,一度令美股亂上加亂。

10月以來油價、美股齊跌,對沖基金損手爛腳不在話下,以商品為核心的策略更加死多兩錢重,老畢日前提及的Andurand Commodities Fund便因單月慘蝕兩成,給媒體當新聞「唱通街」。

俗語有云,食得鹹魚抵得渴,炒嘢唔係賺就蝕,長勝將軍四個字,一係神話一係老作。更何況,正如在下日前所說,投資者不大可能有前冇後打死罷就,瞓身買入一隻商品基金。這類投資佔資產組合一成已經好盡,條數計落,基金蝕廿個巴仙,等於投資者賬面虧損2%,唔死得人也。

血本無歸仲要補倉

話分兩頭,真係咁唔好彩,買入的基金一鋪清袋,投資者這個部位便會輸乾輸淨,講緊嘅就唔係2%而係10%。100萬蝕10萬,1000萬唔見100萬, 你都咪話唔傷。這樣的例子彷彿遠在天邊,實則近在眼前。

Andurand炒油賴嘢無疑慘情,但尚未至於一鋪清袋,而該基金上月所以勁蝕兩成,全因油價極速轉向,sorry都冇聲便殺好友一個措手不及,9個月贏埋唔夠一個月輸。真正冇仇報的乃逆市造淡,以沽售天然氣認購期權(Short Call)策略執行bearish觀點的OptionSellers.com。

該公司創辦人James Cordier上周四向投資者發信,通知客戶交易錄得嚴重虧損,期權賬戶大有可能因現金不足而要向經紀追補欠款。凡事涉及錢銀就冇情講,班苦主血本無歸仲要補倉,發起爛渣上嚟,官司都有得打。

唔講大家未必知,James Cordier於發信翌日在YouTube上放了一條片,穿戴整齊、正襟危坐地向客戶發表10分鐘講話,態度萬分誠懇唔在講,眼裏還隱隱泛着淚光,一副求投資者原諒的模樣。

知唔知自己做緊乜

這位據聞身經百戰的期權操作者七情上面向苦主道歉,不僅博不到客戶同情,還惹來行內人冷嘲熱諷,譏其空有多年經驗,卻連基本風險管理也付之厥如,Short Call既不做對沖更唔識止蝕,輸死都唔抵可憐。在鐘擺的另一端,苦主對Cordier採用的期權策略毫無認識,血汗錢輕易付託於他,蝕到渣都冇不亦活該?

但凡資產市場立立亂,不少論者有理冇理第一時間入衍生工具數,惟問題根源往往不在工具本身,而是參與者究竟知唔知自己做緊乜。以OptionSellers.com為例,顧名思義,操盤人即James Cordier是做Short不做Long的。在累街坊一役上,此君於美國天氣較預期寒冷且天然氣庫存偏低的情況下看淡,本身已屬逆勢操作,加之沒有真實資產墊底,任由Short Call倉位stay naked,過程中既不對沖更不止蝕,天然氣價格創出四年半新高,爆倉乃理所當然的結果。

值得一提的是,就在Cordier發信客戶當日,天然氣期貨單日急挫17%,之後數天雖彈番上去,惟波動之大於此可見。此君行走江湖數十載,衰第樣也許情有可原,斷正風險管理呢瓣,行家唔乘機插到佢暈都對唔住自己。

說到期權,老畢有若干個人意見想跟大家分享。Naked Short Call一旦遇上正股或其他資產升穿行使價,投資者面對的風險跟直接沽空無異,但由於Short Call賺盡只是期權金的全部,與直接沽空者博正股/資產價格急挫有大茶飯可吃不同。此所以,論者每當提及不作對沖的沽售認購期權操作時,多以「風險無限、利潤有限」八字將之具體化。相反,在談及簡單的Long Call / Long Put時,由於蝕盡只是期權金的全部,而潛在利潤理論上無限或接近無限,因而愛用「風險有限、利潤無限」加以表述。

概念誤導諗錯隔籬

技術上,相關說法不失精準,惟對期權初哥來說,「無限」、「有限」、「風險」、「利潤」等概念很易讓人諗錯隔籬。做Long若被一句風險有限利潤無限誤導,不假思索就在一兩個trade上all-in,輸死恐怕未天光。做Short若懂適當對沖,比如透過一沽一買搭建spread,又或為倉位提供足夠實貨墊底,利潤確實有限,但風險焉會無限?

即使Naked Short Call,開倉前訂下清晰止蝕位並嚴格執行,任何時候都有離場的自由。諸如福士當年挾淡倉事件逃生無門,畢竟是「黑天鵝」;正常情況下,冇人搵支槍指住閣下個頭,逼你像James Cordier那樣死都唔走,倉爆咗喊嚟都嘥眼淚矣!

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads