2018年11月10日
11月9日,周五。近日翻開港報地產版,觸目所及不是二手劈價就是新盤撻訂,其中一則說新界上車樂園嘉湖山莊翠湖居3座一個實用面積636方呎單位,上月施政報告發表後以738萬元易主,成交價貴絕區內屋苑標準戶。
想不到一個月未夠即面目全非,實呎相等的嘉湖「大三房」單位五字頭有交易,雖說座數層數有別,惟三四個禮拜相差200萬元,股市中人常說高位回落兩成就係熊市,樓市縱不能依樣葫蘆照搬,但如果這也不算進入下行周期,點先算?
粵語殘片?
本報社評建議放眼高樓價引發的種種不健康社會現象,以正面態度看待樓價下跌。
語重心長,但講就容易,莫說靠發展商高成數按揭兼摸頂上車一族隨時淪為負資產,就算供滿樓冇壓力,日日眼見樓市負面消息一籮籮,心情少不免受影響,幽默感都少啲。
世事就係咁諷刺,仔女開到聲,父母做得到點忍心唔幫。上咗車先發現樓價只升不跌原來係一廂情願,仔女分分鐘反過來怪父母同佢哋癲埋一份,翻按加按自住物業助其上車。當初狠心say no,而家咪唔使變負資產囉。幫又唔係,唔幫又唔係,誰說難為天下父母心只是粵語殘片的老套橋段?
社評提到英國推出咁耐畀人鬧咁耐的購房援助計劃「幫你買」(Help-to-Buy),歸根究柢,又係高樓價惹的禍。這個等同以公帑補貼首次置業人士上車的計劃,老畢原先聽講話2021年期滿後不會再續,但財相夏文達(Philip Hammond)於上月底發表的2018年預算案中把計劃延長兩年,即2023年才完成歷史任務。
從「幫你買」2013年登場到2023年謝幕,頭尾剛好10年,英國政府為計劃參與者提供的免息貸款,加加埋埋冇300億都有250億英鎊。輿論狠批政府不把寶貴資源用在具經濟效益的項目,慷納稅人之慨協助沒本事買樓的人置業,真正得益的只有拜樓價上升所賜賺個盆滿缽滿的物業發展商。
首置獨升
與靠本港發展商提供高成數按揭上車的業主一樣,「幫你買」使用者畀好少首期便能踏上置業階梯,英國不同地區情況雖略有分別,但整體而言,新建住宅準買家只須拿出5%首期,就可獲政府批出相當於物業價值20%的5年期免息貸款,再向銀行借埋餘下的75%,即能升呢做業主,簡單講即係變相做九成半按揭。
從【圖】可見,英國住宅成交個案中分別以海外買家及投資者為主的現金(Cash)和「以租養房」(Buy-to-Let, BTL)類別,成交宗數早已雙雙在2015年見頂,此後大幅回落,唯獨首置買家(First-time Buyers, FTB)成交宗數一直保持穩定的上升勢頭。
「幫你買」援助對象乃首次置業人士,而英國新建房屋與二手住宅價差自計劃推出以來愈拉愈闊,連大摩都忍唔住於去年10月出報告詳論此事。投行當然不會忽然變身「良心鬥士」,所以咁好火,無非認為享盡「幫你買溢價」的發展商,利好因素已在股價中反映得七七八八,再升空間有限,潛台詞是叫股民有糊快食。
見者心寒
香港樓劈價劈到見者心寒,悉尼業界又講到當地樓市陷入冰河時期咁誇張,英國磚頭則靠「幫你買」撐(政府決定延長計劃兩年,玄機也許在此)。環球樓市轉勢未,答案不已寫在牆上?
訂戶登入
下一篇: | 人行盯上了你 |
上一篇: | 香港股市周五收市統計 |