2018年10月20日
10月19日,周五。每當股市嗅到燶味,總會聽到諸般好像很有道理,其實於事無補甚至令人無名火起的「建議」。一行兩會領導人齊聲力撐A股,帶挈港股都有番啲生氣,本來不應掃興,但今年全球股市遍吹淡風,強如美股,近日波動性亦大增。
市況轉弱,評論員就如何應對出謀獻策理所當然,但諸如趁反彈減持、跌市莫驚放眼長線一類「忠告」,非但無法令人心緒平靜下來,愈聽反而愈火滾,明明冇事都畀你講到有事。
一腳伸你落車
問題不在建議本身,勸人作息定時多菜少肉,何錯之有?可是,叫高位摸頂的股民坐緊艇時放眼長線,就好比以為自己好勁嘅人走去玩過山車,落嚟嗰吓先知大鑊,正當心膽俱裂之際,隔籬坐慣坐熱唔知驚嗰個,係咁唔停口猛話淡定有錢剩,試問嚇到魂不附體那位,點會唔想一腳伸你落車當報仇?
喺唔適當嘅時候講唔適當嘅嘢,不管多有道理,聽在當事人耳中都猶如落井下石,於事無補兼傷感情。另有一類建議,第一次講好make sense,但講到第10次都係嗰句,自己諗番轉頭,分分鐘也得啖笑。
舉個例,跌市經常聽到「趁反彈減持」這五個字。正路諗,既然落得這個判斷,等於認定市底弱過藥煲,股價勢必一浪低於一浪。第一、二、三次講,還可以說未睇通個市,一來預留空間給自己出錯,二來趁機把倉位調節至長線坐貨坐得舒服的水平,不單冇壞,且稱得上有板有眼。
N次趁反彈減持
然而,唔少人講到第10次仲係趁反彈減持,即係證明你當初睇淡個市判斷英明啦。沿此路進,把「趁反彈減持」換作「趁反彈沽空」,睇得咁通透嘅你豈非發咗好多次達,唔short咪好大嘥?當論者N次叫人趁反彈減持,在下有兩個反應:一、勁!(彈完就散逢Call必中);二、唉!(捉到鹿都唔識脫角)。
講開唔適當嘅時候講唔適當嘅嘢,老畢有一個幾有趣嘅觀察可以同大家分享。夫妻或情人賭氣,平常事而已。行街搭車唱K食飯,男男女女周不時都會大吵大鬧,十次着咗九次都係男方不知何故惹惱女方,繼而被機關槍般掃射一輪。
嬲到收唔到掣
風頭火勢,男方最不宜做的是叫另一半少安毋躁,皆因這樣只會令對方更加扯火,明明差唔多發洩完,畀你一講即刻又收唔到掣,火爆場面至少持續多半粒鐘。道理很簡單,老婆或女友發嬲,源頭幾乎都係男方話極唔聽,一再犯下女方無法容忍的錯(其實可以是雞毛蒜皮的事)。既然錯在男方,不馬上shut up還勸女方冷靜,豈非打人一槍然後叫人唔好流血?易地而處,你㷫唔㷫?
個市要冧,當然唔關你事,但人哋panic緊,你仲唔熟性勸人要冷靜、要放眼長線,怎會不好心着雷劈?為熊市作準備的最適當時機唔係熊市當口,而係牛市未完嘅時候。
放大圖片 / 顯示原圖
訂戶登入