2018年10月12日
10月11日,周四。老畢剛說當局者迷,美股即晚就冧畀你睇。美國10年期債息上周三於一日之內抽升12個基點,其時很多人仍說長息上升值得拍掌,皆因債市終於認同美國經濟勢頭良好,股市冇有怕。豈料10年息觸及3.2厘後,投資者反過來擔心債息上咗落唔番去,標普500指數一跌就係5日,道指周三最後半小時那一插,唔到你唔嘩一聲,重磅科技股被質得更慘,不久前緊隨蘋果突破萬億美元市值的亞馬遜,話咁快便從上月高位回落一成半。
分別只在輸多輸少
市場就係咁,一兩日之間,債息上升極速由好事變壞事,冇幾耐之前全世界都在講一旦短息高於長息,美債孳息曲線倒掛就麻煩;等到長息開始升快些,投資者又驚聯儲局加息加過龍,經濟畀鮑威爾搞到冇運行。
美股今年表現跟新興市場(EM)一天一地,背馳之嚴重前所未見,大家猛猜到底係新興市場否極泰來跟美股升,還是美股有咁耐風流有咁耐折墮,終須追隨全球跌,冇可能一枝獨秀到天荒地老。大行仲畀咗個名堂這個玩意,叫Convergence Trade。其實,此類意念一般都唔會有效得幾耐,皆因班人眼見美滙稍軟,睇都未睇清楚就話背馳將通過EM反彈得到解決(resolved);當發現反過來先啱數,又會講咗去第二度,話美股跌係因為資金從tech / momentum流入defensive / value。
睇板塊ETF表現,自然不會無跡可尋,但如果跑贏跑輸分別只在輸多輸少,個市氣氛咁差,你會唔會聽人講兩句就冒坐艇風險,以為玩rotation就冇事?銀行搶緊錢,現金本身就是股票的強勁對手,convergence 也好、rotation也罷,都唔係諗咁簡單。
與「知己」有緣無分
侵侵衰多口,話聯儲局加息「瘋狂」,撩唔起鮑威爾把火,反而惹來全球中央銀行家群起而攻,撐老鮑撐到出面。老畢就話,如果特朗普當初唔係睇耶倫唔順眼,係都唔畀佢連任,話唔定可以如願以償,毋須搞到架就自己丟,面就冇人畀。
耶倫上月在布魯金斯研究所發表演說,指零息維持久一些(lower for longer)有助延長經濟景氣,公開市場委員會應以強而有力的聲明為這個政策路向背書。換句話說,Fed若仍由耶倫揸弗,美國貨幣政策很可能呈現順周期(pro-cyclical)傾向,不會像鮑威爾那樣,船頭驚經濟過熱,船尾怕通脹失控。那豈非正合侵侵心意?
耶倫卸任後才顯露出大鴿派本色,對無官一身輕的她沒有任何影響,惟特朗普聽在耳裏,會否暗自呻笨?當然,講係一套,耶倫當真繼續執掌聯儲局,做可能又係另一套。就給侵侵留一點想像空間,讓他久不久就為與「知己」有緣無分長嗟短嘆吧。
輪到金發威
美國剛公布了9月份消費物價指數(CPI),按月升0.1%,按年則升2.3%;撇除食品及能源的核心通脹率為2.2%,數據較預期弱。美國10年期債息稍回,執筆一刻造3.16厘,但幫唔到美股幾多,道指早段一度升過幾十點,但很快就倒跌近300點,反而金價最有睇頭,重越千二關後竄上1220美元,金礦股ETF(紐交所代號GDX)更漲近半成。美股唔掂,美債唔掂,發咗好耐吽哣嘅黃金,難道終於重拾避險功能?係就唔多盞矣。
放大圖片 / 顯示原圖
訂戶登入
下一篇: | 神鵰俠侶 絕跡江湖 |
上一篇: | 香港股市上日收市統計 |