2018年9月24日
高鐵通車,做了一日頭條。高鐵最佳效果,係搭兩小時車程以內,三小時已經係上限。人類有選擇的話,係唔想困在交通工具太耐。兩小時車程範圍之內,高鐵是難有對手。換句話說,高鐵其實是方便了番禺同佛山一帶,一小時直達,以往係任何交通工具都冇可能。要香港人長住內地然後搭高鐵香港返工,目前係不切實際,一個月搭車要一萬銀,除非將來有月票。
用一萬銀在番禺可以住得好有尊嚴,萬一車費加住屋費可以令生活質素提高,真係可以迫使香港人搬離香港。一條鐵路唔會改變人類生活習慣,但環境逼人,唯有靠條鐵路改變生活嘅地方。
證監即將諮詢港股買賣實名制,唔使諮詢都知道未來必定係逆意強推。金融服務界議員素來被批評唔幫業界發聲,佢話實名制冇乜特別,反正而家證監都可以要求券商提供資料。
議員的神邏輯叫人拍案叫絕,難怪唔係太多人有資格做議員。
議員唔讀多啲書,都應該睇多啲戲。Thanos想殺晒全宇宙一半嘅生物,你唔會話反正佢都會逐個星球飛去屠殺,倒不如讓佢彈指之間殺晒咪一樣。
監管機構要攞資料,有時間成本,會有合理懷疑,索取合理時段資料;正因為有時間成本,所以唔會隨意攞市民私隱去研究。假如行實名制,所有市民持倉同買賣,每分每秒即時一鍵看清,而且機構上下個個都可在寫字枱面前部電腦一眼睇晒,咁方便嘅監控,同現況相差好遠,並非議員所講咁輕描淡寫。
LEI係金融海嘯之後的產物,用LEI嚟辨識身份,等於每個人都是監犯,用數字識別。世界更加先進,電話愈出愈厲害,但人類嘅自由係愈嚟愈少。
全世界政府都走向監控管治,每個人嘅活動都唔再係私隱,更加冇秘密。你唔可以改變社會,唯有改變自己生活。
訂戶登入