熱門:

2018年9月19日

方卓如 方如玉帥

貿易戰打久了就唔再係戰

打風之後第二日,交通開始回復正常,但其實山竹嘅破壞有排未可以完全善後。好多私人地方嘅冧樹係未清理,未計那些搖搖欲墜嘅樹枝樹幹。吹咗上岸嘅遊艇,未知幾時可以推返落水。呢啲冧樹同船隻上岸嘅畫面,換着係海地同菲律賓,香港人就會視之為重災區。只係香港人有車返工萬事足,感覺上認為生活回復正常,打風後果只係返工搭唔到車。

美國再向2000億美元中國出口貨加徵10%關稅,恒指先跌後升。貿易戰嘅負面消息已經完全消化,對大市唔再係壞消息?唔太可能。市場唔係真係咁有效率,即時就可以將所有消息price in。所以大市永遠唔會一跌到底,同時亦唔會一升到頂。貿易戰最大殺傷力係將中國嘅製造業連根拔起,倒閉潮同債務違約潮只係剛剛開始。

在內地,開廠唔容易,關廠更加困難。一方面冇咗美國訂單,另一方面要使一大筆執咗間廠,生意人嘅噩夢只係剛剛開始。睇新聞你見到玩具商人削價賣樓,連自住嘅豪宅都賣埋。你估呢類減產套現嘅事情只係個別事件?2019年你會見到更多同類新聞。本來搵到錢嘅人要面對工廠減產同財務減產,雙重減產之下,你覺得而家係消化晒貿易戰壞消息還是漫漫長路?

要陰乾式下跌嘅市況翻生,突如其來嘅好消息係其中一個場面。例如特朗普話唔打貿易戰,聯儲局開始減慢加息步伐。

但你估呢個情況有冇可能?如果共和黨中期選舉失利,是否可以令特朗普取消貿易戰?一定唔會,取消就等於認衰,兩年後選總統佢輸梗。佢只會更加重手,務求得到貿易戰最終勝利,先有起死回生嘅可能。所以,無論中期選舉結果如何,貿易戰唔會因為結果而停戰。馬雲講得啱,貿易戰隨時打20年。

下跌嘅市況會否因市場麻木了,覺得不外如是,出現上升?只有這個可能。呢個世界,市場基本是上上落落,有升有跌。貿易戰打久了,就唔再係戰,係新常態。正如美國減稅,減稅一刻是驚喜,減完之後就是常態。當貿易戰殺晒一批冇實力嘅市場人士,留得低嘅就在新常態下再玩過。

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads