熱門:

2018年9月15日

畢老林 投資者日記

最怕識得嘅人都有錢過自己

9月14日,周五。外甥女牛一,早早book定酒店諗住同妹妹一家到濠江玩番晚,豈料天公不造美,一個風走咗,另一個號稱史上最強嘅颱風又迎面殺到埋嚟,真係多得「山竹」唔少。

經歷「天鴿」教訓,澳門人見過鬼怕黑,防災猶如備戰。咁嘅環境梗係取消行程,好在可以改期,三個月內光臨,booking仍然有效,已繳的房租唔會嘥。

鬼叫你選擇相信

世事就係咁,吃喝玩樂也好,投資炒賣也罷,人算怎敵得過天算?Plan得幾perfect都冇用,兩個風前後腳吹襲港澳,邊度都去唔到,疊埋心水買定嘢喺屋企打邊爐好過。

早兩日在CNN Money看到一篇文章,標題係Bitcoin crash: This man lost his savings when cryptocurrencies plunged。講到咁白,睇唔睇內容其實冇乜分別,只是加密貨幣年頭hit到好似係人都有嘢發表,七八個月的今天,試問又有幾多人記得自己當時講過乜?

自以為理性仲慘

CNN故事的主人翁叫Russell,去年11月在比特幣身上押了12萬美元,折合港幣接近一球,對唔少人嚟講已經係畢生積蓄。食得鹹魚就要抵得渴,鬼叫你選擇相信crypto?然而,話得說回頭,如果大家對當時發生過乜仲有印象,應想到Russell一類「苦主」大有人在,皆因加密幣升勢實在太凌厲,那種極速賺十倍甚至百倍的誘惑,足以令大部分人難以抗拒。

老畢當時講過,加密幣泡沫愈快爆愈好,否則散戶透過愈來愈多平台接觸到這種東西,爆起上來一鑊熟,連趕潮流沾上crypto色彩的上市公司亦必受累,情況就如當年的dotcom。人就係咁衰格,最怕冇人陪你窮;說準確一點,應該話最怕識得嘅人都有錢過自己。如果「窮」係因為冇同人癲埋一份,最後接火棒衰收尾嗰個,分分鐘係原先自以為最理性那位。

唔係老畢亂吹,閣下不妨睇吓知名度僅次於Bitcoin嘅加密貨幣Ethereum(以太幣),去年1月至今年2月狂飆169倍,2月見頂以來瀉近九成,高位摸入當然蝕到渣都冇。可是,去年1月買入持有至今,以太幣個價相對今年2月雖跌淨個零頭,但跟去年1月相比依然高出近20倍,傷心一件事,爛船點都唔止剩番三斤釘。

盲毛智者齊賴嘢

老畢見去唔成澳門,發吓噏風搵嘢嚟講而已。去年1月,比特幣都未必個個聽過,你話當其時有幾多人叻到識得買以太幣?等到連瑞波幣(Ripple)都有大棚人爭住認專家,你先慌死執輸買埋一份,落注仲要狼到球球聲,想唔變CNN故事中的Russell都難。呢位仁兄睇怕都係盲毛一名,賴嘢好正常,但智慧高如牛頓,咪一樣到死嗰日都唔准人喺佢老人家面前提起South Sea兩個字?

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads