熱門:

2018年9月12日

方卓如 方如玉帥

萬眾期待好消息

恒指由高位跌超過兩成,眾說步入熊市。杜氏理論沒有計入人為因素,例如不顧別人死活嘅貿易戰,純粹是從企業盈利,大市水平去將趨勢分階段,每個階段時間長短都講唔出。套用在今天政府政策左右市場嘅大環境,根本沒有任何預測能力。假如明天特朗普話講吓笑啫,佢同習大大咁好朋友,明天所有關稅取消,仲要從中國多入口5000億美元貨物,作為向中國人的中秋賀禮,我肯定恒指即時勁升2000點。這樣,熊市咪一期都未行完就即時結束?一個人嘅意志可以影響市場走勢,再分一、二、三期就變得毫無意義。

反而二十一世紀全部都係講資金流向。二十世紀初杜氏年代,市場絕對沒有今日數量嘅閒資,貨幣供應更加唔係今天的話印就印,買股票仍然是看公司盈利,睇基本因素。

100年後嘅今天,買股票靠人群心理,只要大家認為得,就買得,如同買比特幣。無業績嘅生物醫藥公司,無盈利嘅同股不同權公司,跌過五成嘅新經濟公司,呢類股票100年前係諗唔到任何理由會買。最近嘅新股極速跌破招股價,但毛記葵涌可以捱到接近半年先跌破招股價,相信就算杜氏翻生,都諗唔到如何分析股價走勢。極度人為同資金操控嘅市場,根本沒有任何走勢可以分析。

大冧刺激入市意欲

所以,美國可以牛足9年半,港股就終於變了熊一。但美股可以閃跌而驟然跌到變熊二,而萬一中央救市港股又可以重回牛三,從前跌市當調整。這些牛熊實在太奇妙,只可以事後作為研究題材。但千古不變,人類都係在貪婪與恐懼兩邊輪迴遊走。明顯地,貪嘅人而家少咗,但又未到恐懼一刻。據目測,沒有太多人在狂歡過後慘遭大屠殺,只有個別發展太急的人周轉不靈。市場上有錢但唔敢入市,慢跌會消磨心志同購買力,反而大冧先會刺激入市意欲。而且財富轉移遊戲,大冧先係洗牌嘅好機會。有理由相信,過往印了海量銀紙的關係,而家等冧市嘅人為數不少。陰乾嘅環境下佢哋仍然會等,大冧嘅時候佢哋肯定撲出嚟。記住,大冧就係好消息,到時你要夠膽飛身入市,而家係萬眾期待。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads