熱門:

2018年9月10日

方卓如 方如玉帥

偽善到極點唔怕偽

美國網球公開賽女單決賽,大阪直美對莎蓮娜。大阪直美贏得唔開心,領獎時淚流滿面,因為全場噓聲。噓聲是因為莎蓮娜被罰一局,美國人在美國地頭上被罰,擁躉自然唔高興。

莎蓮娜被罰,緣起裁判對佢作出警告,話莎蓮娜教練打手勢教路。當時莎蓮娜已輸一盤,形勢普通。聽見警告,莎蓮娜大怒,話教練只係對佢豎起手指公讚好,自己唔會出貓爭勝,寧願輸。本來,堂堂莎蓮娜,23次大滿貫冠軍,照計冇人會質疑佢。但莎蓮娜如此回應裁判,證明佢有望向教練,教練見到佢望向自己,有做手勢。人海茫茫,專心比賽,球員特意找出教練位置方向望去,如果唔係尋求某些回應,基本上唔會有這個動作。事實上,鏡頭捕捉莎蓮娜教練,的確有異於直豎拇指嘅手勢。

罪不致罰,但莎蓮娜不斷狂鬧裁判,一次又一次要裁判道歉,又話裁判是賊。終於,第二盤尾段,裁判罰佢一局。擾攘一輪,第二盤輸埋,大阪直美冠軍。頒獎噓聲四起,莎蓮娜這時候又變了冠軍風範,話對手打得好,叫大家唔好再噓,讓大阪直美享受此時此刻。最後?梗係掌聲四起,又變了大愛結局,人人相親相愛,化敵為友。莎蓮娜就此由輸變贏,變成沒有打輸嘅亞軍。

美國人精於計算,大愛嘅表面,底層正在盤算自身利益。Nike用Colin Kaepernick做新一輯廣告代言人,引嚟一大片香港讚好聲音,覺得Nike有吉士,美國民主多元頂呱呱。Colin Kaepernick是美式足球員,賽前奏國歌時用自己方法表示不滿,被班主們封殺,事業停頓。Nike新廣告,就是要賣熱血,唔好理會外界笑你瘋狂,你就是要瘋狂地去大幹一番,哪怕要犧牲所有。Colin Kaepernick正正是完美代言人,事實證明Nike是對的,廣告後網購增長三成。Nike真係天真至此,覺得做人應如唐伯虎,「別人笑我太瘋癲,我笑他人看不穿」?還是覺得要最多人留意「Just Do It」這個30周年campaign,用Colin Kaepernick最具話題爆發性?如果廣告播出後,美國人罷買Nike,Nike寧願執笠,陪Colin一齊事業停頓?

Come on,美國人自細已經有錢嘅概念,工作是生活一部分,同枱食飯,老豆都要夾錢埋單。美國人嘅偽善,特朗普表露無遺,佢問幕僚中國經濟如何,佢同習大大好老友,唔想中國經濟差。美國人嘅偽善,已經進化到唔怕你發覺是偽,唔介意假到出面。看見莎蓮娜,看見香港人讚Nike,我明白點解有人會被騙1.8億。

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads