2018年9月3日
港股上周反彈,恒指上周五收報27888點,跌275點,一周則累升217點。整個8月份恒指累跌694點,連跌4個月,會否出現似樣的熊二反彈?8月收市稍低於20個月線(27898)10點,算是險守,而且陰燭下影線較長,反映低位有承接。不過宏觀消息壞多好少,9月能否如願反彈,機會一半。
美國最快本周便公布對2000億美元中國貨徵稅清單,係預期中的壞消息,市場已作部分反映,但仍要看具體內容,包括稅率的高低,如果只係小部分25%,大部分10%,話唔定當好消息炒。當然仲要睇埋中國如何報復,係重大不明朗因素。
侵侵大嘴巴,話美加貿易談判「美國話晒事」,激嬲加拿大人,搞到談判無成果。惠譽把意大利信用評級展望由「穩定」降為「負面」,標普亦把阿根廷評級展望降至「負面」,並警告不排除將之降至「垃圾級」,都係利淡消息。
利好消息難長炒
好消息也是有的,內地個人所得稅起徵點由月入3500元人仔提高至5000元,看來是加大力度穩經濟的其中一招,消息利好消費股。歐盟今起取消對華太陽能板及太陽能電池進口管制,對個別光伏股係好消息。問題係以目前市況,好消息可以炒幾耐?
過去一周趁市反彈,筆者開始以股票期權Long Put累積淡倉。造淡對象包括內房股、本地地產股和港交所(00388)。另一個Long Put對象係蒙牛(02319),6月時提過佢貴,當時往績P⁄E 44倍,上周跌到去35.9倍,依然係貴,睇走勢股價有機會落去20元。蒙牛早前公布中期業績,純利增長38.5%,至15.62億元人仔,高盛報告指出,增長低於預期的18億元人民幣,而且經常性溢利只增12%,銷售開支高蠶食收入增長,只給予中性評級。
放大圖片 / 顯示原圖
訂戶登入
下一篇: | Walmart順勢谷生意 |
上一篇: | 恒指8月穿頭破腳 9月向下尋底 |