熱門:

2018年8月21日

方卓如 方如玉帥

市場餓了炒股票很久

CEC國際(00759)主席林偉駿離世,股價炒高一倍,成交股數更接近公眾持股量,可想而知炒賣情況是幾咁熱烈,認真唔畀面。又一次說明,股票升跌同業績完全無關,只要你畀個原因,讓某隻股票變成焦點,就有短時間炒上嘅動力,市場就有購買力撲入去。一輪廝殺,有人贏有人輸,不出5日跟住就回歸平靜。CEC唔似有莊家主持大局,全憑散戶開片都有咁宏偉嘅場面,可見市場累積了不少炒賣力量,餓了炒股票很久。

開始有大型一手樓盤預留單位轉賣為租,拜空置稅所賜。說明了以往發展商並非囤積,真係市場消化能力有限,要唧牙膏式慢慢賣,托價而沽。如果跟隨政府想法,一次過推出市場劈價求售,樓市即冧。要知道,如果新盤劈價,推冧嘅唔止係樓盤售價,仲推冧埋成個一手市場,繼而二手市場,再落去就連補了地價嘅公共房屋一樣照冧。到時候,政府就要掉轉頭諗救市措施。

香港有樓嘅人係惡過冇樓嘅人,近兩年愈來愈多父幹上車同發展商二按個案,樓市冧一成,呢兩年買樓嘅人賬面好大機會要輸,到時呢批咁安分守己,默默供樓嘅社會穩定分子就會遷怒政府。無殼嘅年輕人同擁有輸錢細殼嘅老實人同時埋怨政府,社會就更加唔穩定。加息周期開始前搞空置稅,政府是否好做唔做?

空置稅最大效果是踢爆了發展商樓盤其實是滯銷。如果沒有空置稅,市場會猜度北角海璇是善價而沽,發展商惜售。繼續招標出售,市民要買貴樓,但買入後價錢有承托,買貴但唔會輸錢。而家留番成幢收租,即係發展商說明了目前市場根本賣唔晒,並唔係惜售。

記住,同一件事,惜售是令人有信心,後市向上望;滯銷是信心殺手,令人觀望,期待更平。一旦市場知道現實是滯銷,買家個個都會睇耐啲,看看是否低處未見低。同股票一樣,成交低,價錢可以係乾升,亦可以係乾跌,全憑大家對未來嘅期望。而家樓市成交進一步冰封,價錢好易因為滯銷預期而乾跌。乾跌,mark一口低價,咁成個樓市就一齊陪跌。要樓市跌一成其實好易,只要一個新盤用低於市價開盤,又或者藍籌屋苑有減價成交個案,哪怕只係講緊些少數量,就足以令整體樓價下跌,方便買家殺價。發展商同業主可以唔到價唔沽,但手上物業價錢就會被一單半單成交拖低。

下半年樓價會跌?我信。加息同政府呢個時候抽空置稅,足以令樓市價量齊跌。如果繼續跌,政府就會開始思考減辣,對有錢在手的人是一大喜訊,你現在知道點解炒家要高調減持了。

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads