2018年8月20日
上年《全美一叮》有美少女腹語,技驚四座,吸引好多人注意。今年沒有了金髮美少女,失色了,換了個男嘅Shin Lim,一樣是厲害腳色。
Shin Lim玩的是紙牌魔術,將一副啤牌變來變去,而家係奪冠次熱門。Shin Lim其實在《全美一叮》前已經算做成名,佢上過Penn & Teller兩季,YouTube點擊率超過5000萬。Penn & Teller是魔術師,佢哋嘅真人show節目,邀請全世界不同魔術師上來表現,如果Penn & Teller講唔出或者講錯魔術的竅妙就算輸。香港人都上過這個節目,但就俾佢兩個拆穿把戲。
Shin Lim兩次上Penn & Teller,都能夠騙倒佢兩個,睇唔穿佢點變,代表佢技術是專業水平。但Shin Lim本來是彈鋼琴,大學讀音樂。七年前手傷,轉行鑽研魔術。學魔術,只係從YouTube睇人點玩,再自行苦練。因為佢本身讀音樂,表現嘅時候將視覺同音樂結合,睇得特別醒神,同睇跳舞一樣。他表現的是手快,你捉佢唔到,同彈琴一樣。
手快,手傷就收山。兩年前,Shin Lim練到手指公受傷,手術加物理治療,停了半年。復出後,就係再上Penn & Teller,證明毋須收山。《全美一叮》玩噱頭,魔術睇兩次就冇新鮮感,未必可以攞冠軍。佢訂了婚,想借此成名,在Vegas有自己的show,未知最終能否如願。
而家年輕人,成名更快,十幾歲已經全球知名。佢哋成名,唔係因為讀書叻,而係有門玩意玩得精。上年Darci Lyne玩腹語,只玩了兩年。究意腹語同紙牌魔術玩得精,能否出人頭地?我相信機會大過讀書叻。而家嘅世界,讀書叻唔係前途保證,反而玩得出色先可以殺出血路。年輕人唔需要人教,只要佢哋玩得開心,就能自成一家。
香港仲要年輕人背書考試,好快就追唔上世界。香港家長唔喜歡小朋友玩,要讀書,但反而玩先有前途。如果我係家長,最緊要發現小朋友喜歡玩什麼,一於要佢玩到最精。如果佢喜歡玩股票,咁就安樂晒。
訂戶登入
下一篇: | 高追聯想未必有着數 |
上一篇: | 「滬港通」及「深港通」上周收市統計 |