2018年8月16日
恒指昨天收報27323點,跌429點,大市成交額1114億元。騰訊(00700)收市後公布業績,高增長神話終於破滅,昨天夜期一度跌超過500點,今天又係跌幾百點嘅一日。除非你覺得今次係股災,否則要諗諗是否繼續買跌。
大市自2016年最低位18278點起步,升到33484點,升超過萬五點,如果要調整六成,即係要跌9000點,落到24000點。而家打開電視,全部都係壞消息,趁壞消息買貨,好消息沽貨,而家先係開始尋寶嘅時候。
而家仲未到股災,好嘅股票一啲都唔平。中電(00002)創新高,太古(00019)創一年新高,領展(00823)繼續在歷史高位徘徊。如果係股災,呢啲好嘢應該跌到超值畀你執死雞,基金應該畀客戶追錢贖回,銀行應該唔肯借錢出嚟。而家沒有低殘筍貨,基金沒有續回潮,銀行資金仍然充裕,絕對唔係股災。不過,唔係股災都跌去7000點,醒嘅就一早走得甩,慢一步嘅最多輸兩成,其實殺傷力唔算驚人。
騰訊業績不符預期,最驚嚇嘅係內地政府唔批准遊戲上架。騰訊唔受貿易戰影響,唔怕美國政府,但受制於內地政府。最有創意嘅行業,受嘅掣肘可能最多,就算公司已經冇夢想,賺錢嘅動力從來未減少過。騰訊依然係科技龍頭,霸佔了半個科技江山。
分析上市嘅財技一浪接一浪,就算市場唔再追捧科技股,上得市嘅賬面一定係暴利。騰訊嘅科技地位,已經同社會穩定連成一線,騰訊先係大得不能倒。佢可能高速增長神話破滅,不過賺錢能力絕對唔會消失。當騰訊跌落300蚊,你要問佢會否退步到打回原形,返回當年200蚊嘅營業規模。如果佢霸佔嘅地盤愈嚟愈大,而唔係輸畀對手,咁佢又點會一沉不起?
如果騰訊跌到落300蚊是平是貴?股票嘅嘢,你喺旁邊睇就貴,落咗場買就平,從來都係角度問題,而唔係數學問題。你一直望,幾時都貴。
訂戶登入
下一篇: | 恒指下月料現賣出訊號 |
上一篇: | 「滬港通」及「深港通」上日收市統計 |