熱門:

2018年8月15日

麥狄文 金融街密語

內地P2P網貸須續整肅

內地P2P網絡貸款平台掀起爆煲潮,據資料顯示,截至今年7月底止,內地P2P網貸行業累計平台數量已達到6385家(包括停業及問題平台),其中問題平台累計為2286家,7月新增問題平台165家,創近一年以來新高。

去槓桿力度強 風險推升

呢個數字仍然不斷增加,據說目前涉案金額最高可達萬億元人仔,已屬天文數字級別。之前多名P2P網貸受害人更集體赴京上訪,不過事後遭警方帶走。

受害人上訪不成,唔少人更認為係受害人貪心,貪P2P平台息高,又可以靈活進出,既然食得鹹魚抵得渴,風險大招致損失亦唔可以怨得邊個。不過有外國傳媒就爆料,國內唔少P2P平台都有政府機構,或者國有銀行做擔保,報道更指出呢場係官商合謀大騙局,唔係地方政府推波助瀾,呢啲網貸平台根本搞唔成。

其實阿Man唔多相信,喺習大大嚴打貪腐,整肅官商勾結歪風下,地方政府咁大膽官商合謀詐騙民間財富,反而係由於去槓桿力度唔細,再加埋當中有網貸平台違規經營,令行業風險上升。網貸爆煲未能償債,主要係資金鏈斷裂,控制人失蹤或涉嫌非法吸取存款被查;另一個原因係有企業借資金後,生意不景只有清盤。內地早有法例規定,網貸機構只可擔當訊息中介,撮合借貸雙方,但偏偏有部分P2P偏離軌道,除咗做中介人之外,更擔當高利貸借方,令行業出現良莠不齊嘅情況。

政府須研有序退出機制

本來P2P網貸有助紓解中小企融資問題,同時又可以滿足民間投資需求,P2P網貸實在有其存在價值。只不過內地P2P網貸平台已去到一個泛濫地步,相對英美等發達國家,全國網貸平台不超過100間,內地就算經過今次一輪大洗牌,超過七八成P2P平台已摺埋後,現存P2P平台仍然超過1800間,即係仍然大有縮減空間,點樣形成一套良好有序嘅退出機制,係目前當局最頭痛嘅地方。

目前內地已有去槓桿改變為穩槓桿策略,其實去槓桿唔單止係點樣減低債務,而係如何去重建市場規則,過去10年全球央行都行緊寬鬆政策,資金過度充裕,令借貸方相信永遠有平債冚平債,將要還債嘅責任完全拋諸腦後。而放貸一方則過分依賴中介平台包底,完全唔考慮借貸風險。

高槓桿背後,阿爺放水亦僅集中向國企跟地方政府開水喉,民營企業借貸無門,民間投資喺內地股市一潭死水下亦苦無出路,先衍生大量P2P網貸平台,民企跟民間投資一拍即合。呢種資本結構性錯配,最終喺去槓桿力推之下暴露缺點,終令P2P網貸出現爆煲潮。

凡事總有兩面,P2P網貸若能適當運用,當然可推動經濟,相反罔顧風險,只會為內地金融系統添煩添亂。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads