熱門:

2018年8月10日

方卓如 方如玉帥

貿易戰都有受惠者

貿易戰嘅影響,就算將來停戰,殺傷力都唔會逆轉,殺低咗就係殺低咗。中國嘅工廠生產力會大減,可以走嘅都會出走,去晒其他東南亞國家,貿易戰完咗都唔會返轉頭。呢班中國工人被遣散之後,可以走去邊?唔通個個都創業,搞四大發明共享單車?又唔會返璞歸真回農村,唯有留在城市搵機會,淪為低端人口。

貿易戰唔只係一個經濟問題,最後必會成為社會問題。人民生活不穩,必然引發政治問題。正如前國務院總理溫家寶所講,一個很小嘅問題,乘以13億人口,都會變成很大問題。貿易戰本身就係大問題,乘以13億,你話幾恐怖。

內地嘅工廠全部殺晒,但有廠在東南亞國家嘅港商就生猛晒。佢哋嘅議價能力最高,如果中國出口要加25%稅,東南亞廠加你5%,客戶都仲有20%水位。當你面前嘅選擇係減少25%還是5%利潤,個個做生意嘅都識揀。貿易戰都有受惠者,唔係全世界都受害。

所以,貿易戰改變了世界經濟格局。東南亞國家就係30年前嘅中國,用勞動力改善人民生活,增加國家收入。而家去東南亞發展,類似30年前走入大陸,問題係你願唔願意留低發展。

以前花時間在中國,30年後修成正果,你可以搖身變成政協委員,仲有一個中國政商人脈網。在東南亞30年後,你最多都只係一個富商,當地華僑唔見有錢以外嘅得着,始終你係外人。是否值得好似30年前嘅投入,見仁見智,但未來5至10年最易畀香港人搵錢嘅,就係呢類地方。

唔係做廠嘅,都會受貿易戰影響,因為經濟格局唔同咗,自然出現財富轉移。香港嘅命脈係金融同地產,股票已經畀貿易戰拖冧幾千點,地產就面對着加息嘅影響。

內地一早就想將啲低端工廠移走,向高科技進發。但主動轉型,同被迫消失係兩回事。而家中國是未能無縫銜接,呢段經濟真空期,必定出現有人破產,有人執平貨。香港從來都係錢甖同提款機混合體,好境嘅時候盡收天下資金,環境艱難時畀人攞錢回大本營救駕。

最壞嘅時候還未到,而家係套現等執平貨嘅最佳時候。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads