熱門:

2018年7月20日

方卓如 方如玉帥

豪宅同公屋混合起來

與我同輩嘅有唔少人老早就北上發展,而家個個都坐晒高位,差唔多係時候要諗退落嚟,因為咁高嘅位,好難畀你坐一世。佢哋必然會諗返嚟香港,但其實就算佢哋想諗,都唔係咁易做得到。點解?因為佢哋喺香港冇樓,返嚟住喺邊?佢哋雖然喺內地有樓,賺到笑,但沽咗,錢又調唔到返香港,冇用。加上佢哋值錢嘅人脈全部喺內地,返到香港鬼有人識你,同個畢業生冇分別。所以,呢班早期北上發展嘅,實際上已經移民內地,係內地人,唔再係香港人。

二十一世紀,人口遷移咁容易,除非係原始森林或者冰天雪地,否則都好難搵到個城市係純種原居民住晒,冇外來人口入侵。香港人唔喜歡自己生活被人打擾,你睇吓歐洲,睇吓巴黎。

佢哋受遊客同難民打擾之苦,相信更甚於香港。你睇吓京都,人哋幾百年禪修寧靜嘅生活,而家被遊客搞到烏煙瘴氣。你去睇吓清水寺,而家變咗黃大仙。

乜都係假,地球上最珍貴嘅資源,幾時都係多人聚居嘅土地同埋食水。食水唔到你擁有,但係買樓係能力範圍。香港只會愈嚟愈多人,土地愈嚟愈珍貴,銀紙愈印愈多,年輕人宜快手出賣你嘅青春,畀500呎綁住,因為呢個係唔使用腦嘅致富方法。

全世界只有香港提供了一條白癡都可以發達嘅門路,儲錢買樓坐喺度等就得,時間會為你創富。假如肯用點腦筋,買樓更加可以變成生意。買樓是否穩賺不賠?

冇嘢係穩賺,穩賺嘅一定畀人搶到冇錢賺, 但香港買樓要輸,只能怪你冇眼光同冇實力,無法穩守。買樓等同法國隊踢波,先唔畀你攻入大門,總有方法入你一球,咁就贏。

安達臣道由私人樓宇變成公屋樂園,投了首幅私人地嘅發展商欲哭無淚。看得出連發展商都受政府影響,唔只係小市民受房屋政策之苦。全香港只有港島半山區係冇公屋,其他任何土地,政府都會想辦法起一兩幢公共房屋。你成日話樓價貴,政府最能夠推低樓價嘅方法,就係喺你屋企隔籬起公屋,咁就令樓價貴不起來。不過,假以時日,大家就會習慣,豪宅同公屋會混合起來。

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads