熱門:

2018年7月19日

方卓如 方如玉帥

冇人買嘅股票唔一定係差嘅公司

一年一度書展又嚟,作為散貨嘅好地方,書展其實功不可沒。一本書如果賣到2000本已經算好成績,700萬人賣2000本,不如連呢2000本都唔好印,慳番啲紙,網上收費閱讀,可能賺得仲多。出一本書其實相當費心神,又要設計,又要排版,又要校對。錯咗,冇得返轉頭。如果係網上版,幾時發現錯處,幾時可以改,永遠的beta版,咁先迎合社會步伐。出書,同世界直情脫節。

書展新書是吸引人埋嚟睇埋嚟揀, 散倉底貨先係最大功能。香港租貴,賣唔去嘅書連上架嘅機會都冇,只有書展才能夠重見天日。書展嘅氣氛,令人特別有購買慾,加上有折,真係唔買都對唔住自己。

況且書展嘅環境,咁多書一字排開, 平時睇唔上眼嘅書,都會突然變成名著,情形就好似去咗沙灘,烈日當空,着住泳衣,位位都係俊男美女。7日之內盡情散貨,希望可以賺夠一年舖租。

如果股票有個書展式散貨場就very good。香港上市公司數量,多過一本書可以賣出嘅數量,超過2000間。2000間上市公司,你連名都未識得晒,點識得去買?冇人買嘅股票,其實比書商嘅倉底貨仲多。要令到隻股票有人肯買,係需要好多精力。唔單止盤生意要做得好,仲要識得如何話畀人知你做得好。能夠股價逐步上升嘅股票,市面上唔多,大多數都係升升跌跌,長揸就算唔係輸死人,都係得個桔。

而且,唔派息嘅股票其實係郵票,要人肯買,先要令人相信會有下手肯買。否則,更賺錢嘅公司,股價都可以一直跌。你見到市場上竟然有P⁄E只有一倍嘅股票,就知你成日以為公司賺錢股價就升, 完全係幻覺。

如果有個散貨場,將賣唔出嘅股票攤晒出嚟,埋嚟睇埋嚟揀,最多學書展一樣打個折頭,你話幾開心。冇人買嘅股票唔一定係差嘅公司,正如垃圾公司嘅股票一樣可以當炒,只要入到指數成分股。散貨場可能名字太唔好聽,改稱為路演即刻觀感唔同晒。不過,有些股票注定係冇人肯買。雖則沒有醜嘅女人,只有懶嘅女人,但冇人肯買嘅股票,你點勤力都冇用。

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads