熱門:

2018年7月18日

麥狄文 金融街密語

比亞迪上演羅生門

繼之前有女子唐琳冒認中鐵建(01186)高層大鬧法庭,揭發一張周街可隨便打印出嚟嘅所謂大公司卡片,就可以冒充高層之後。呢兩日又輪到比亞迪(01211)被爆有人冒認高層,仲要代表公司穿梭廣告商同客戶之間,歷時長達3年。呢單冒充騙案相當離奇,但比亞迪似乎並非純綷是受害者咁簡單,皆因成單嘢疑點重重,與其話有人白撞冒充公司高層,倒不如話係企業管治出咗問題,內部監控嚴重疏漏。

從未授權經營活動

比亞迪呢單新聞,喺內地相當轟動,皆因係呢個自認係比亞迪高層嘅女子李娟,3年以嚟一直穿梭喺比亞迪同廣告供應商之間。最爆嘅係,李娟竟然憑一己之力,喺今年4月代表比亞迪同英超球會阿仙奴簽署宣傳合作,比亞迪成為球隊官方汽車及巴士合作夥伴,有關協議係由比亞迪品牌公關部部長李巍簽署。但比亞迪發公告澄清李娟及另一涉案嘅幕後老闆「陳振宇」並非比亞迪員工或前員工,並對有關合作毫不知情,公司表示從未授權兩位以比亞迪名義經營活動及代表比亞迪簽署合同。由於事件嚴重,警方已介入調查。

查實李娟喺呢單案件中,所擔當嘅角色似乎未有得到任何行騙利益,騙案中受害者,當然係畀人拖數嘅廣告公司,而案中最大得益者,應數到食咗3年免費宣傳套餐嘅比亞迪。呢單所謂騙案嘅重點係比亞迪實際上無任何經濟損失,家下東窗事發,廣告商為比亞迪前期墊付嘅廣告費涉及金額高達11億元人民幣,比亞迪一句話公司無呢個人,所有文件合約係偽造,就連合約上所蓋嘅印章都係A貨,就想將呢筆以十億計嘅廣告費推得一乾二淨。

有內地傳媒引述廣告商指出,自2016年開始,李娟一直以上海比亞迪電動車有限公司市場部總經理身份與其接觸,但有時又係另一廣告商上海雨鴻文化傳播有限公司。根據李娟所寫嘅一份自述書,表示呢單嘢有「幕後老闆」存在。據報一位自稱比亞迪隱形股東嘅「陳振宇」,喺2016年向李娟表示比亞迪內部換血,要力捧新人,但重組過程存在灰色地帶,所以畀李娟以供應商(上海雨鴻)名義跟比亞迪總部對接。李娟其實亦有懷疑過自己角色,但都白白做咗3年比亞迪跑腿。

可惜隻鑊一爆,李娟兩面不是人,比亞迪跟上海雨鴻均否認李娟係公司員工,但3年以嚟,佢又確係存在過,更顯得案中主角李娟,以及佢口中所講嘅幕後老闆陳振宇,身份更加撲朔迷離。

雖然比亞迪集團高級副總裁兼比亞迪北美分公司總裁、比亞迪董事長王傳福妻子李柯表示被騙子陷害,但試問若然李娟未有比亞迪內部人士默許,李娟口中嘅幕後老闆陳振宇以及上海雨鴻,有冇可能有機會跟比亞迪促成重大商業關係?

內部監控存在漏洞

期間李娟以廣告供應商上海雨鴻文化名義,以「免費宣傳」合作模式跟比亞迪合作,比亞迪更承認李娟曾與公司廣告部門及大量相關員工對接。咁比亞迪有乜可能完全唔知情,問題係廣告公司跟客戶之間,以及中介人涉及幾多利益,外人實在難以知情,但比亞迪一句「我什麼都不知道!」就想拋低11億人仔廣告數當無發生過,而且更反映其內部監控存在漏洞,內地企業嘅管理水平確係令投資者難以放心,唔知呢件事發生後,股神畢非德對其持有的比亞迪股份有冇新的諗法。

麥狄文(徐狄怡.證監會持牌人)

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads