2018年7月10日
同小米(01810)同日上市嘅公司真慘,大家都係上市公司,「同股不同場」,要另外覓地孤單敲鑼。小米個鑼仲係有史以來最大,「同敲不同鑼」,趣致。所以話,而家搞上市公司,唔使賺得多錢,係要搞到市值夠大。市值愈大,愈多人買,因為你做咗指數成分股,自然逼人要跟。其實又好應份,因為搞市值比搞盈利更困難。搞盈利只要做好自己,搞市值要向外求助,求人買你股票,不停集資;搞盈利是公司管理,搞市值是金錢管理;識搞盈利同時又識搞市值者,必定成為首富。
泰國足球小將在洞穴困了大半個月,陸續被救離,將來可能會成為電影題材,就好似2010年智利礦坑救出33名礦工一樣。如果泰國有記錄低救人過程,隨時係奧斯卡得獎紀錄片。帶小朋友入洞探險嘅教練俾人鬧:點解會令小朋友身陷險境?但足球小將可以在洞內捱過10日等人發現,教練功不可沒。
未試過逆境嘅人係唔會知道,逆境本身未必可怕,唔知逆境幾時完結先係最可怕。足球小將如果在洞內知道明天就有人來救,隨時在洞內嘻嘻哈哈開party,猜第一個出現嘅救星是否外國人。問題是當你被困在漆黑一片嘅洞穴10日,好容易精神崩潰。大人都未必能夠冷靜捱過,何況是坐唔定嘅小朋友?如果唔係有教練給予眾人連佢自己都未必相信嘅希望,十幾個小朋友係冇可能坐定定等救援。教練在這10天做了什麼,說了什麼,先至係呢條紀錄片最值得記錄嘅嘢。如果有人訪問教練成書,又會係Shackleton級數嘅領導教材。
相比之下,股市嘅逆境輕鬆得多。更衰嘅股市,例如迷失廿年嘅日本股市,都唔會一沉到底打橫行,終有一日谷底回升。買錯股票是冇得救,但跌咗落去嘅大市總會有日升返。你唔需要有足球小將嘅意志力,都可以等到大市回升嘅一天。你見到市場氣氛哀鴻遍野,其實係做功課執平貨嘅好時機。
訂戶登入
下一篇: | 小米的神級公關 |
上一篇: | 「滬港通」及「深港通」上日收市統計 |