2018年6月8日
恒生指數昨收報31512點,升253點,成交額1055億元。港股六連升,美股五連升,蘋果股價更屢創新高,接近200美元,市值直衝一萬億美元。
市場一片好景,但世界最大嘅對沖基金Bridgewater卻睇淡資本市場,而家嘅倉位係空倉居多,沽空大市。佢哋喺最新一期自行編寫嘅市場觀察中寫道,美國聯儲局收水又加息,目前10年期美國債券有3厘息,孳息曲線開始平坦,在種種因素之下,2019年非常危險。
你信唔信Bridgewater?而家係咪黑暗前嘅黃昏?傳說中嘅大冧市是否即將出現?世界最大嘅對沖基金落注買跌,仲公開宣揚慌死人哋唔知,直情係全副身家兼名譽地位一齊押上去,輸咗唔止輸錢,仲會輸埋客戶信任,撤資回水。講到咁硬,似乎真係胸有成竹。咪住,叫咗你讀多啲書,讀多啲書冇咁易畀人呃。Bridgewater類似嘅分析,37年前曾經出現過。達里奧(Ray Dalio)本Principles未教你發達之前,先講佢嘅發跡史。
佢响1981年3月親自寫了市場觀察,題為The next depression in perspective,指出債務太多,將會經濟衰退。當時10年期美債孳息又係急升,孳息曲線倒掛。達里奧重注揸金同揸債券,睇淡股票。結果?Bridgewater輸到得返佢自己一個員工。
輸完呢次,達里奧總結經驗:第一,千祈唔好過分自信,唔好情緒蓋過理智,要好肯定地永遠唔好太肯定;第二,債務過多唔一定係問題,政府印銀紙(即係再借)係可以令經濟死過翻生;最後,要掌握最佳入市時機非常困難,入市太早,守得太耐,你未必可以享受到看得準確嘅成果。
37年後,Bridgewater又嚟睇淡大市,同市場對着幹,今次佢會報返當年之仇,還是會再輸一次?同佢一齊睇淡嘅人,市場上大有人在,但通常都係慣常淡友,長期睇淡,但又唔見佢哋輸到離場,證明佢哋言行未必一致。只有Bridgewater咁實牙實齒,你唔信佢,都要信達里奧所講,永遠唔好太自信。
訂戶登入
下一篇: | 品味愈走愈遠的年代 |
上一篇: | 「滬港通」及「深港通」上日收市統計 |