熱門:

2018年5月25日

方卓如 方如玉帥

沽空機構相當冇大志

特金會取消,加上中美貿易戰回棋唔算數要再傾過,世界又回復到一個月前,當冇事發生過。北韓已經開始消毁核試場,兌現承諾,牌面上反而係美國唔行這一步。有特朗普嘅世界,你永遠唔可以太樂觀,佢總有辦法令市場氣氛緊張起來。

新秀麗(01910)被沽空機構狙擊, 跌10%停牌。而家最麻煩係,凡是有負面新聞或報告,公司會被要求澄清,要無奈停牌。停牌未必係最佳對付沽空機構嘅方法,因為佢哋可以場外買貨補倉,如果停牌太耐準備回應指摘,更多手上有貨又有賺錢水位嘅投資者,唔介意打折場外沽貨離場。最佳殺退沽空機構嘅方法,係盡快簡潔回應復牌,再搵人支持公司,市場掃貨。藍籌瑞聲(02018)都被狙擊過,短暫停牌,出嚟否認指控,而家唔只股價升返晒,沽空機構亦唔見佢繼續出聲。

究竟新秀麗有什麼俾人狙擊?話佢Purchase Price Accounting整靚盤數。尋常百姓唔會睇得明沽空機構指控新秀麗嘅報告,因為我睇完之後諗咗一陣,我懷疑寫呢份報告嘅人是否有些概念搞錯,亦令我懷疑究竟係寫報告嘅人唔識會計,還是唔識會計嘅人是我(有這個可能)。

PPA要把收購回來嘅目標公司,將佢嘅資產負債公平估值,分類入數。沽空機構話新秀麗高估收購回來的Tumi應付賬,可能就此避免了高達一億美金費用入賬。

照計應付賬是應該入咗賬,只係未找數。將費用從賬上掹走,應該放响應收賬那邊,唔係應付賬。再諗,是否谷大應付賬,減少商譽,降低將來減值數字?但估高應付賬,減少資產淨值,商譽更高,減值風險更凶。沽空報告用紅線劃出核數師指出PPA涉及很多人為主觀判斷,佐證沽空機構懷疑得有道理。但這類說明是基本動作,核數師用嚟保障自己,屬娘親是女子的廢話。沽空機構用呢段字等於自己發現新大陸,寫報告呢個人相當可疑。

再睇,佢話新秀麗股價應該跌一半先合理,淨係呢句已經唔合格。如果造假數嘅公司,股價應該一蚊都唔值。仲值一半,即係盤數係真,只係你覺得現價相對盈利貴。但呢個世界,股價同盈利係無必然關係,否則亞馬遜同Tesla都應該停牌。寫咁長嘅報告,只係想股價冧一半,呢間沽空機構相當冇大志。

有本經典書叫Accounting for Growth,是第一本話盈利可以執出來。但從來盈利都只係計算結果,全盤數只得現金呢個數字係客觀存在,其他全部都可以係瞬間即逝。

我已經冇興趣再睇呢啲會計東西,對人類致富是完全冇幫助。今次好奇睇吓人哋有什麼驚天大發現,更加發覺失去興趣是正確。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads