2018年4月30日
諾貝爾和平獎唔使諗,一定頒俾金正恩,仲係應該由佢獨領才合理。佢單手玩到中美南韓氹氹轉,由幾乎爆發核戰急速反彈至朝鮮無核化,比食神更加估你唔到。地球最有機會核戰嘅地方無核化,末日時鐘可以校慢幾分鐘。政治嘅嘢一日都嫌長,任何你認為冇可能嘅事都可以發生,千祈唔好理所當然嚟分析世界,這是投資第一戒條。
對沖基金經理Ray Dalio上年出嘅書Principles,最近在內地媒體有節錄,迅即在微信廣傳。這本書內地譯做《原則》,其實應該係《戒條》,因為它是教你成功秘訣,絕對唔係講原則。基金經理年屆60,善心大發,覺得自己成功意義不大,倒不如教人如何成功。成功是否可以受教,因人而異,但睇吓成功人士思路過程一看無妨。佢教你做人同做事嘅戒條,佢是否自己做足都成疑問,但心靈雞湯治癒類嘅讀物永遠有市場,由有錢人口中說出,說服力更大,所以先會瘋傳。
教人成功嘅書,最好睇嘅部分必定係講失敗嘅章節。你冇留意?所有成功人士嘅著作,必定有寫佢失敗嘅一刻。這部分寫得愈慘情,往後嘅成功先顯得得來不易。Steve Jobs嘅自傳講佢俾人踢出蘋果,成副身家攞咗去搞Next同Pixar,Toy Story唔收得就再無本錢翻身。
Dalio呢本書,一樣有講佢1982年最唔掂嘅時候,賭錯市,輸到成間公司冇錢出糧,走剩一個員工,就係佢自己,仲要問老豆借4千蚊。1982年輸晒到而家成為世界百大首富,證明金融市場有極速致富能力,如果你目標是要搵錢,千方百計都要留喺呢個市場。
2018年會唔會好多人學似Dalio當年賭錯市?過去幾年大市好易賭,狂印銀紙,令股票債券價升,瞇埋眼都曉贏。2018年開始,資產價格唔再係直線上升,上上落落,仲有冧價嘅隱憂。睇返Dalio睇錯市輸晒東山再起,在當今時勢,有警世作用。唔係咁多人有本事從頭嚟過,金融海嘯一戰成名嘅John Paulson,成名至今再未贏過,最近為了留住客戶資金,要玩優先劣後,聞者唏噓。如果Paulson要寫另一本教人成功嘅書,睇怕要等20年後,因為佢目前仍然停留在書中講述失敗嘅章節。
訂戶登入
下一篇: | 世界已進入「估佢唔到」狀態 |
上一篇: | 「滬港通」及「深港通」上周收市統計 |