2018年4月27日
歐聯最佳戲碼,梗係利物浦對皇馬,肯定全港球迷唔瞓都要睇。
呢場波,賭波集團最喜歡,牌面強弱懸殊,注碼一面倒,結果隨時爆冷,為世界盃攞定籌碼,做定熱身。下星期就見真章,利迷有福了。
南北韓首腦會談,第一次有北韓領導人踏足南韓。又一次證明政治市係玩謝市民,上年仲係有美國開戰攻打北韓嘅擔憂,股市都跌過幾次。而家唔單止唔會打仗,朝鮮半島隨時無核化,美國同北韓可以變成朋友,你話當時各位專家認真討論美韓開戰機會,現在望返轉頭,是否好愚蠢?全世界都係政治市,睇升睇跌全憑睇政府,同公司本事逐漸關係不大。
騰訊(00700)有份投資的電影公司計劃上市,這間公司連續3年都係蝕錢,印證我早前所講,而家唔係講盈利,係講規模。你有盈利,計你P⁄E,籌嘅錢可能唔多;反而你蝕錢,規模夠大,估值可以更高,籌嘅錢仲多,你話邊樣着數?所以而家你做生意要改變思維,唔好一味諗住盡快賺錢,反而要一心追求極速壯大,大規模蝕大錢。愈大愈蝕,反而仲有更多錢排隊送畀你,蝕得愈勁愈搵到錢。以前做生意要靠盈利創造現金流,而家係靠做大籌錢搵現金流。如何極速壯大,其實易過極速盈利,因為壯大靠使錢,盈利靠賺錢,小朋友都知使錢易過賺錢。
銀行定期存款接近兩厘,美國10年債有3厘,市民無風險投資開始有選擇,會否令股票房地產價格受壓?
股價同利率嘅關係,由美國打破了兩者相反走向嘅關係,加息都可以股價上升。同一道理,加息是否又會樓價續升?唔講供樓負擔,如果銀行都有兩厘息,回報隨時好過買樓收租,會否令樓價下跌?至少香港係唔會,因為香港樓市嘅共識係只會向上,唔單止保本,仲有增值。
銀行存款唔會無端端連本都增值,只係賺息。但買樓賺息賺價,存款怎可以媲美?一日這個共識存在,存款利息增加都唔會可以搶走買樓嘅錢。有錢就買磚頭呢個概念,其實係幾代人嘅共識,有這支持,正如陳啟宗話齋,香港點會係低樓價城市?
訂戶登入
下一篇: | 期結後見真章 |
上一篇: | 「滬港通」及「深港通」上日收市統計 |