2018年4月25日
由平保(02318)分拆嘅平安好醫生(01833)周一開始招股,多間券商首日已借出超過800億元孖展認購額,相當於IPO部分超額認購達150倍,不過仍未能打破舊年「新股王」閱文(00772)首日招股已達千億元孖展紀錄。平安好醫生已引入7名基石投資者(cornerstone),包括新加坡主權財富基金新加坡政府投資公司(GIC)、馬來西亞國家主權基金國庫控股(Khazanah Nasional)、美國資產管理公司貝萊德(BlackRock)、加拿大養老金投資公司(CPPIB)、瑞士再保險(Swiss Re)、資本集團(Capital Group)跟泰國正大集團。
對於呢班基石投資者,似乎無視平安好醫生仍然虧蝕,認為平安好醫生IPO嘅定價同埋估值合理,雖然暫時仍處於虧損狀態,但已組建團隊跟平台,加上已取得一定數目嘅用戶,只要註冊用戶數量上升,每名用戶嘅成本自然下降,相信平安好醫生好快可以實現盈利。平安好醫生雖然去年收入急增兩倍至18.7億元人民幣,但係虧損同樣擴大至10億元人民幣。
IPO價入貨 須守禁售期
以目前平安好醫生招股價介乎每股50.8元至54.8元,其估值介乎580億至逾800億元,較其去年底啟動IPO計劃前,最後一次完成嘅上市前融資時約54億美元(約421.2億港元)估值,再大增四成,換句話講已引入嘅7名基石投資者,較幾個月入股嘅前期投資者(Pre-IPO),買貨買貴足足四成。
通常呢類新經濟股嘅前期投資者,待股份上市後,就可以計數離場。當然愈早投入前期投資,成本愈平,之後只要有更多輪上市前融資,即我哋成日聽見嘅A輪集資,之後到B、C、D……至N輪都有,愈接近正式IPO接貨,成本當然愈貴。不過阿Man認為,最有膽識都係一班基石投資者,買貨已經同一般入場散戶同一代價,但cornerstone通常設有6至12個月禁售期不等,即係即使上市後股價勁升,但升勢若未能維持,股價未能喺6個月後仍高企,基石投資者亦只係「蜑家雞見水」,有得睇冇得食。
睇番去年底上市嘅三隻熱爆新經濟股,下個月陸續解禁,包括上述嘅閱文、連超人紅顏知己亦捧場嘅雷蛇(01337),以及得到內地一眾科網巨企成為前期投資者嘅易鑫(02858),以噚日收市價計,只有閱文嘅基石投資者仍有盈利喺手,而雷蛇跟易鑫嘅cornerstone分別輸緊超過三成及四成。見到咁嘅情況,唔知雷蛇同易鑫嘅cornerstone對兩股前景仲有冇信心,禁售期後忍痛止蝕,抑或死守但求希望在明天呢?
阿Man只係睇到,當一隻未上市新股,進行得愈多輪嘅上市前融資,而家閒閒哋都由A輪去到E輪,甚至FGH輪都有,即係估值一輪高過一輪。去到IPO引入嘅cornerstone,仲要係IPO價接貨,兼有禁售期,愈多輪嘅前期融資,就會令cornerstone風險系數增加,呢個情況持續的話,睇怕未來要上市嘅新經濟股,再搵cornerstone水魚嘅難度將愈來愈高。
麥狄文(徐狄怡.證監會持牌人)
訂戶登入
下一篇: | 部署入摩 升勢重現 |
上一篇: | 中興通訊對投資者的啟示 |