2018年4月19日
中環中心成交之後,出現拆售個案,最新每方呎意向價5萬蚊以上。年頭我已經寫道,中環中心成交價400億元,坊間報道有50億元水位,我就話佢哋唔識計數,其實成手貨值550億元至真,買家必賺。而家拆售個案,件件賺錢。
古語有云,機會留給有準備嘅人。現代語謂,機會留給有錢有關係嘅人,你冇錢,乜都唔使講;有錢,唔識人,想入門口賺一份都冇機會。如何練成有錢有機會,是一生嘅功業。
中環中心是由一間合組公司購入,太公分豬肉逐層分給投資者,相信是為了均真。有人想即時拆售,有人想長線收租,如何一間公司照顧唔同要求?萬一拆售嘅部分將來被稅局找上門,稅款又怎能由全公司攤分?最好方法,按大家出資抽籤次序揀層數,學發展商列明每層價單,大家揀選自己心頭好,各自處理,費用自付。夾份買樓仲可以有各自自主,係做慣生意嘅有錢人先可以諗到。
如果將來可以把資產代幣化,中環中心就可以有更科學嘅處理方法。將買番嚟嘅業權變成代幣,大家揸幾多幣就等於揸幾多層樓。
同比特幣唔同,每個比特幣都是一模一樣,但每層樓其實唔同,冇理由60樓同6樓都化為同一數量嘅代幣。但智慧合約嘅厲害係,可以將每一粒幣變為獨一無二,6樓嘅幣同60樓嘅幣唔同,價值亦可因而有異。ERC721正是這種特性,加密貓都是由此而來。用來玩嘅場景化為金融應用,大把痛點讓你解決。
股票冇晒創意空間
加密貨幣或者背後嘅Blockchain,其實最啱財技高手使用。而家股票反而冇晒創意空間,印股票難,蛇吞象唔容許,話你反向收購。就連印公仔紙收購,都要左驗右驗,落實無期。股票已經再唔會出現財技操作,反而加密貨幣還有創意空間。喜歡用腦嘅人士,你有福了,大把想像空間,前所未見。
訂戶登入
下一篇: | 大市氣氛弱 趁反彈加淡倉 |
上一篇: | 「滬港通」及「深港通」上日收市統計 |