熱門:

2018年4月19日

麥狄文 金融街密語

假.貿易戰 真.科技冷戰

中國電訊產業龍頭中興通訊(00763),啱啱畀美國斬斷其關鍵技術及零組件長達7年,由於公司來自美國企業嘅零部件佔其原物料總成本10%至15%,咁樣搞一搞供應鏈或因此斷裂,公司生意唔知點再做落去。

呢件事發生之後,公司即時拉閘停賽。今次禁令主要針對晶片領域,除咗高端智能手機要延後推出,最大鑊係電訊設備高達25%至30%零件依賴美企供應,呢鋪可以話係毁滅性打擊,若然情況再惡化,甚至會影響未來中國5G網絡推進。

美國取得談判話語權

美國向中興作出咁嘅舉動,與其話係喺中美貿易戰再補一槍,不如話係中美科技冷戰正式揭幕,目的係恐怕中國企業繼續得到美企最先進高科技產品之後,中國企業自行研究,總有一日中國唔再依賴美國提供,實現自主可控,對美國科技產業嘅影響深遠而巨大。而高科技產業嘅核心代表集成電路(IC)產業,問題關鍵係政策同基金設立均屬國家內政範疇,其他國家無權干涉,美國政府要有效保護中美IC產業之間差距,先至係打呢場貿易戰初衷,乜鬼鋼鐵關稅甚至其他進口商品關稅,都只係開展貿易戰嘅藉口,真正戰場喺科技產業。而美國竟然對中興通訊開刀,實為談判重要籌碼,希望喺未來談判之中,有個人質喺手,可以取得話語權。

其實呢場中美科技冷戰,早喺特朗普上場已有跡可尋,對於來自國外投資審查史無前例咁嚴格,而被美國外資投資委員會(CFIUS)叫停外來投資項目有增無減。自「侵侵」政府上台以來,被CFIUS阻攔或因敏感資料原因而被終止嘅外資併購交易有10宗,而中國投資者佔8宗,當中有兩宗正正係關於半導體行業。值得留意係其餘兩單被阻交易,其中一單係博通(Broadcom)跟高通(Qualcomm)併購方案,雖然併購一方來自新加坡,但被叫停原因都係同中國有關。CFIUS以國家安全風險為由阻止交易,主要原因係擔心併購後會削弱高通競爭力,令華為等中國企業喺5G標準制定上影響力擴大。嘩,咁即係到講明,「China, you are not welcome」啫!!

力阻中國IC產業崛起

唔少美國企業開始因為政府壓力,而選擇放棄同中國企業合作,最新鮮滾熱辣就係美國最大消費電子零售商Best Buy,中斷跟華為聯繫,把其所有貨品下架。對於正想喺美國市場大展拳腳嘅華為嚟講,簡真係被重擊一拳。

過去幾年,華為一直努力打入美國市場,跟亞馬遜同埋New Egg等零售商建立合作關係,而Best Buy更加係華為最大合作夥伴之一。見到亞馬遜同華為嘅合作,終於明白點解較早前「侵侵」對佢窮追猛打,原來衰仔唔生性,同華為做拍檔。

講到底「侵侵」挑起呢場貿易戰,實際上係對中國科技產業高速發展極為擔心,尤其中國IC產業崛起,即使現階段中美IC產業仍有好大距離,但難保中國用大量政策跟政府資源等投入,扶持行業成長,加速國內IC產業推進,終有一日會實現國際替代進口。就以中興通訊為例,近年中興喺美國芯片跟美國電訊設備上,投入資金高達140億美元,直接或間接喺美國市場創造咗兩萬個就業崗位。同一時間,喺美國當地業務中,中興手機嘅業務份額已經打入頭五名,可見一旦中國能夠喺IC產業上做到自給自足,甚至打入國際市場,美國喺呢個產業上有幾大損失。

美國大部分科技企業,包括Google、蘋果公司、沃爾瑪等,曾聯合上書「侵侵」嗌救命,好言相勸佢收手,表示打貿易戰,實施嚴厲關稅政策將惹嚟報復,重創美國出口業,對美國企業跟經濟產生負面影響。當大家明白到「侵侵」挑起戰火嘅背後原因,長遠係為咗保護美國科技產業嘅利益,恐怕佢老人家唔會太輕易罷休,惟有睇吓阿爺如何應對呢場科技冷戰。

麥狄文(徐狄怡.證監會持牌人)

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads