2018年4月10日
MotoGP,賽事中馬坤斯被罰要回到龍尾,佢為咗追趕前車,逢車過車,不顧危險駕駛,還令羅斯跌車。馬坤斯成為罪人,尤其是羅斯粉痛斥,但佢鬥心之強,無可置疑。曼城對曼聯,曼城贏波就攞聯賽冠軍,上半場已經領先兩球,主場球迷,仲唔瘋狂準備慶祝?但係摩連奴在半場休息時同球員講,唔想在人哋慶祝派對做小丑。陣中球員畢竟有名有姓,即時俾佢嚇醒,下半場鬥心返晒嚟,反勝3︰2,搞到曼城今晚歐聯鬥利物浦,信心大打折扣。哥爾夫球大師賽,神童Jordan Spieth在最後一輪比賽,鬥心大爆發,打出低九桿,追平領先嘅Patrick Reed。可惜最後一洞打出超一桿,最後跌返落第三。
See?呢啲頂級運動員,日練夜練,技術唔再係致勝因素,最後都係睇你鬥心,鬥心先會提升競爭力。否則,同一班波,點解上半場同下半場唔同晒?逢車過車,點解跌嘅係人哋唔係你?同一個場地連打4日,點解最後一日先打低九桿?同一個人,想贏定唔想贏,決定了結果。
做生意一樣,想贏先有錢賺,得過且過就輸梗。做生意,賺十元八塊夠食夠住,遲早連十元八塊都賺唔到,輸埋。一定要永遠覺得唔夠,去諗點樣賺埋你褲袋裏面嘅散紙,咁你就贏。換着係輸梗冇錢賺,你都要想破腦袋,諗計點樣贏返轉頭。舉手投降,咁就一世。
Steve Jobs本自傳就係咁寫。佢俾蘋果踢出局後,用晒佢全副身家,搞Pixar同Next電腦。佢嘅本錢,同首富30歲時賺到嘅錢一樣,夠食過世。但係全靠佢係有鬥心嘅人,唔會攞筆錢退休算數,反而推落去做啲唔係必勝嘅生意。如果佢鬥心唔夠,你仲係用緊大哥大手機。
所以,打工嘅人同創業嘅人係兩類人。沒有不怕死嘅鬥心,千祈唔好做生意,因為最終你都係賺份糧,倒不如走去打工,𢭃人份糧。要做生意,就要有馬坤斯唔怕車死嘅膽量,曼聯唔想做小丑嘅心態,但最好嘅係有Jordan Spieth一日打低九桿嘅手氣。
訂戶登入
下一篇: | 非常「專業」的公關 |
上一篇: | 「滬港通」及「深港通」上日收市統計 |