熱門:

2018年3月26日

高仁 財圈識真假

識破中資「唉賓」基金斂財招數

上文提要:近年內地企業來港上市蔚然成風,中資投行都爭崩頭搶「刁」,但搶得到亦未必好,以低價搶「刁」導致「冇肉食」,「唉賓」惟有使出蠱惑招數,務求在包銷中搵食。各位「巴打」,講完新股包銷搵食秘技之後,高仁與「豬朋狗友」戴孤劃、程更計及中資投行「唉賓架」鍾國通在飯局之中,繼續探討中資「唉賓」另一蠱惑招數:如何透過教唆民企老闆成立基金斂財。

在披露對話實錄之前,請各位「巴打」重溫人物背景,簡介如下:

戴孤劃──又稱「戴Sir」,《信報》「蠱壇辨虛實」專欄作家,上市公司大股東,經常欺壓小股東;

程更計──本地證券行經紀兼財務顧問,除了招呼散戶之外,亦向上市公司出謀獻計;

鍾國通──中資投行「唉賓架」,熟悉中國國情。

高 仁:各位「巴打」,我畀一個謎語大家估吓,世界上有邊份工,既有名又有利,而且可以用人哋嘅錢呢?

鍾國通:高仁,等我補充一吓。佢不但可以勁買assets(資產),又唔怕gearing(資產負債比率)高,而且唔怕攤薄上市股東權益呢?

目標民企老闆

戴孤劃:中國元宵節都過咗啦,仲玩猜燈謎!?快啲開估啦!

高 仁:哈哈!咪就係中資「唉賓」教民企老闆成立基金囉。

程更計:點樣sell橋先?

高 仁:中資「唉賓」會對民企老闆落足嘴頭咁話,不但可以賺到GP(General Partner,普通合夥人)嘅管理費(約1.5%至2%),仲可以有LP(Limited Partner,有限合夥人)嘅收益分成,兼且可以分拆資產或項目上市,賺埋IPO浸錢。

鍾國通:當然,中資「唉賓」會話,人有基金,你有基金,所以「個朵」係至關重要;民企雖然可以自己成立基金,但係成立之後冇人認可,連籌措資金都會有好大障礙;但如果咱們投行可以借「個朵」出嚟同佢哋合資成立基金,民企老闆立刻水鬼升城堭,公信力倍增!

戴孤劃:Oh!「巴打」,I see。但民企老闆梗係睇住舊錢,啲錢點樣分配法先?

鍾國通:中資「唉賓」會同民企老闆講,合資基金會有3個LP,佢哋係國營投行會出80億做senior(優先),保證國營投行每年有10%的IRR(內在回報率),其餘兩個分別出20億做subordinated(劣後、次級)。

程更計:各位「巴打」,咁咪同做孖展差唔多,民企老闆可以一炮三響,地產項目就可以注入基金,上市公司手執4號同9號牌變成金融殼,身價即時增值喎!

高 仁:其實,呢個中資「唉賓」係以半年結和全年結去計算花紅,花紅主要視乎所持有資產或項目嘅浮盈或浮虧,即係unrealized gain or unrealized loss而定。

一併處理壞賬

鍾國通:所以,國營投行本身唔可以有太多壞賬,如果有壞賬就要趕快喺半年結或全年結前處理好,否則會影響到「唉賓」自己嘅花紅同飯碗。

程更計:哦!我知啦!中資「唉賓」諗到利用同民企成立基金,把一啲壞賬項目或資產注入基金,從而提高國營投行喺半年結或全年結嘅浮盈。

高 仁:說到底,「唉賓」都係自私嘅動物,自己嘅B仔(bonus)最緊要。民企老闆嘅死活,話知你啦!哈哈!

「蠱惑的唉賓」系列.之四

本欄逢周一刊出

如想與高仁交流上市公司的財技個案及招數,請電郵至[email protected]

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads