2018年3月26日
美國開打貿易戰,向中國貨品徵收600億美元關稅,中國還擊,徵收30億美元關稅,數字強弱懸殊,唔係報復嘅級數。美國大豆不在報復名單,因為中國有三分一大豆從美國進口,徵收關稅,會令本土物價上升。美國大豆農業係特朗普支持者,收大豆關稅對特朗普有壓力。我都知嘅嘢,中國、美國一定知,證明兩國有什麼牌可以打,互相了然於胸。
世界經濟已經唔再跟教科書理論運行,關稅係咪會令美國通脹上升?中國會否用人民幣貶值抵消關稅影響?通脹升溫,利率上升是否比預期更快?貿易戰剛剛開始,大家都在找尋答案,但答案唔會令人開心,而係令你唔見錢嘅結局。
騰訊(00700)遭大股東減持,股價較業績公布前跌去超過一成。呢個股東揸股票17年都唔沽,到而家先沽少少,已經足夠有排用。揸住過萬億港紙嘅股票,冇可能全部沽晒,亦唔可以隨便在市場慢慢沽。一次過大手批股,是唯一可以套現嘅方法,而且又承諾3年內唔再沽。
長揸賺大錢嘅股東,有時係被迫長揸,因為轉身唔單止唔靈活,有時係無法轉身。Naspers嘅市值其實比手持騰訊嘅市值仲要低,反映Naspers股東覺得Naspers所有生意都唔值錢,連騰訊嘅價值都未完全反映。
騰訊股東要害怕嘅,唔係Naspers會否再度減持,而是害怕Naspers萬一經營不善,搞到要清盤,手上嘅騰訊股票要套現還債,咁就大件事。
毛記葵涌(01716)本周三上市,若撞正大跌市,命運會如何?當日亦係期指結算,好有可能會反彈計數。當騰訊都要跌,有得升、有得炒嘅股票唔多,毛記上市反而係最當炒嘅股票,復活節過得是否愉快,周三係最後機會。
訂戶登入
下一篇: | 香港人不是貪那四千元 |
上一篇: | 「滬港通」及「深港通」上周收市統計 |