2018年3月9日
3月8日,周四。科恩頂唔順特朗普劈炮,自由貿易派全軍盡墨,消息話狂人周五會在行政指令上大筆一揮,落實向進口鋼鐵及鋁材開徵重稅。
本報「新聞點評」欄主高天佑周三從選戰角度分析何以貿易戰損人不利己,特朗普仍執迷不悟,誓要透過鋼鋁關稅響第一槍。
打觔斗跳火圈
高兄的看法是,睇見特朗普前面憎埋佢後面的選民,話之你打觔斗跳火圈,寧願吞咗張選票都唔會益佢。既然係咁,即使比現在所做過分十倍,於特朗普何損?相反,保護主義動作有咁大得咁大,上次選舉嫌佢未夠激因而沒投票的選民,下次大選很可能給誘出家門步向票站,條數計落,發動貿易戰對「侵侵」選情有利。
其他因素不理,情況可能真的如此。別的不說,美國傳媒對特朗普的觀感就非常一面倒,莫講話打觔斗跳火圈,就算寫悔過書改邪歸正,媒體都會以陰謀論眼光睇佢,質疑「侵侵」別有用心。
老畢既然有「其他因素不理」這個前設,潛台詞自然是其他因素不能不理。憎特朗普憎到入骨那班選民冇可能反過來撐佢,而上次大選覺得佢未夠癲沒出來投票的選民,下次極有可能把票投給他。如果選戰得失可以用這種思維衡量,那麼「侵侵」能否連任,關鍵就在上次投票給他的選民中有多少會轉軚,條數計落是否足以抵消新增粉絲數量有餘?
美國布魯金斯研究所(Brookings Institution)旗下「大都會政策計劃」(Metropolitan Policy Program)去年發表報告,詳細列出美國哪些大都會區在貿易震盪中受創最深,頭10個區集中在印第安納、南卡羅萊納、阿拉巴馬、路易斯安納、得州這些特朗普於2016年大選中勝出的州份,而10區無一不是極度依賴出口的製造業重鎮。
你做初一我做十五
凡事只要影響到飯碗,就唔到你把口話「鐵粉」。美國識開徵關稅,對手也識還擊,歐盟就準備好你做初一我做十五。「侵侵」靠發動貿易戰鐵打唔甩的基本盤,夠唔夠冚同樣重要州份選民飯碗尤關因而轉軚所失的票,特朗普班軍師睇怕有排計。
美國總統大選勝負取決於選舉人票,贏了popular vote輸掉選舉人票,一樣無緣入主白宮;2016年希拉莉、2000年戈爾兩個民主黨候選人,都是在這樣的情況下飲恨。要較準確地研判貿易戰對「侵侵」連任孰利孰弊,還須細看兩黨傳統票倉以外搖擺州份選舉人票的分布狀況。
美國還有兩年多才再次舉行總統大選,「侵侵」上任剛滿一年便急不及待委出競選主任,恨連任恨到出晒面,貿易戰對選情是得是失,現在講嚟都係靠估。Trader唯利是圖,有錢賺最緊要。
輸晒六球半唔介意
「侵侵」上周四失驚無神call晒班鋼鐵及鋁業高層到白宮開會,席上宣布向進口產品徵稅,當天老畢於Options Trading Research網站發現,美國鋼鐵商AK Steel 4月份行使價7美元的認購期權,有一個trade多達4萬張合約(400萬股)成交,每股0.21美元。
AK Steel近日徘徊於5.6美元水平,咁即係話,個多月後該股必須升至7.21美元(行使價7美元加期權金0.21美元),個trade方能打和,亦即AK Steel要由現價升逾兩成,Long Call先唔使輸。
買價外期權同賭錢差唔多,預咗total loss。可是,即使OTM平,買4萬張AK Steel Call都要付出84萬美元成本,港紙計足足六球半。輸晒六球半唔介意,仲唔係大戶?怕只怕佢睇得真係咁準,鋼鐵業之得等於所有人之失,股市就大鑊矣!
放大圖片 / 顯示原圖訂戶登入
下一篇: | 外貿數據助維穩 速成IPO利科企 |
上一篇: | 香港股市上日收市統計 |