2018年2月27日
同股不同權對科技公司的最大吸引力,是可以擺脫私募基金嘅掣肘。私募入股,要有部分話事權,或至少監管權,以防公司亂使錢,令私募血本無歸。當同股不同權上市之後,私募股份有出路,隨時可以套現離場,就唔使放太多時間望住管理層,望住股價就得。而管理層因為同股不同權,權力可以回到未引入私募之前嘅水平,正是錢又有,權又有,開心到暈。仲有,香港沒有美國咁多訴訟,管理層唔驚俾人告。要知道,同股同權之下,香港嘅小股東已經冇乜保障,何況同股不同權?有權有錢冇煩惱,香港未來提供了咁優厚嘅環境,內地科技公司仲唔覺得係天堂?
有權有錢 買樓虛變實
隨着科技公司來香港上市,老闆們來香港次數多咗,夠晒資格申請優才移民計劃。在香港落腳,身兼上市公司高管,買一間豪宅是常識吧。這間豪宅,一定升值。換言之,可以將科技股較虛嘅紙上富貴,換成較實在嘅磚頭保值,例如美圖(01357)高管上年就買咗中半山Mayfair。唔單止公司可以重回手中牢牢控制,個人財富可以爆炸提升之餘,還可以資產配置,由虛變實。這次同股不同權,將會改變好多人嘅命運。
香港市民唔係冇着數。豪宅被買起,樓市繼續升溫,香港六成幾有樓人士,身家自然上升。同股不同權公司肯定超額認購,半新股繼續是搵食方法。香港繼續係目前中國唯一嘅國際融資平台,對國家有貢獻,還可以享有內地沒有嘅自由,例如上Facebook、搞ICO、網上寫旅行「登機」,全憑香港要繼續吸納國外資金所賜。香港最大嘅「一國兩制」,係行港幣同資金自由兌換制,就算股票市場正在A股化,資金還沒有人民幣化,香港就係靠呢份老本食到而家。同股不同權將呢項「一國兩制」發揮到高峰,未來兩年,香港係水浸到眼眉。咁多水嘅地方,乜嘢都會浮得起,全部升到上山頂。
訂戶登入
下一篇: | 世界在開倒車 |
上一篇: | 「滬港通」及「深港通」上日收市統計 |