熱門:

2018年1月24日

麥狄文 金融街密語

寶勝私有化 台灣老闆識計數

上周阿Man講過乜嘢原因今年港股會係超級大牛市,結果上周三恒指收市31983點同噚日收市32930點計,短短4個交易日,港股又進賬近千點。

呢個牛市咪估頂

而呢段期間,港股成交額亦愈嚟愈多,每日過千億係等閒事,噚日成交額更達1979億元,接近2000億元,但仍未刷新2015年2500億元嘅紀錄。以目前咁多成分股已破頂計算,成交額理應增加,目前嘅成交額反映大市仍未進入瘋狂狀態,莫講話全民皆股,就連基金仍未好積極入市。

今年呢個牛市確係唔簡單,只係第一個月,基金追貨追到氣咳,全年高位幾多唔去估,反正已升破歷史新高,就算畏高唔敢買,都咪懶醒估頂,做淡友未係時候。

講番日前台資運動用品生產商寶成集團,宣布私有化旗下透過裕元(00551)控股嘅寶勝國際(03813),每股作價較上周五收市價溢價超過三成,整項交易涉資約109億元;而寶勝控股權轉讓母公司後,裕元將獲逾67億元現金,所得資金將全數以特別股息方式向股東派發。

表面睇落去,台灣佬好似好大手筆,動用過百億元進行私有化。但如果大家心水清,裕元大股東持有超過五成股份,再望望CCASS餘下嗰四成幾街貨,其中超過四成集中喺4間證券行手中,裕元有幾多街貨大家心中有數。

即係今次派發嘅67億元現金特別息,將大部分落番去大股東個袋,而計埋裕元舊年8月亦曾派發特別股息每股3.5元,換句話講,今次寶成私有化寶勝,淨係計佢表面持有裕元逾五成股份,兩次夾埋收息落袋超過70億元,即係今次私有化實際只係用30億元左右。

溢價收購 實質半價

再計一計寶勝目前每股NAV係1.177元,以發行股數53.38億股計算,成檔嘢值約63億元,亦即係台灣佬用一半價錢,就可以百分百擁有寶勝,佢哋呢鋪真係識計數。

最重要係私有化目的,係為咗讓寶勝嘅營運架構更靈活,講到尾就係為咗方便裕元日後喺零售市場發展。由於寶勝有嘅係內地銷售平台,私有化寶勝之後,裕元可以加強線上線下營運商整合,擴大全渠道能力,策劃推廣活動方面亦可以更有組織,加強門市產品供應及提供相關服務,為全方位進軍內地零售市場作好準備。尤其今年內地政策為咗保持經濟增長,除咗支持基建之外,谷內需都係另一重點,寶成應該係睇好今年內地嘅內需市場,反正又唔需要真金白銀拎過百億出嚟,以30幾億買到60幾億嘅嘢,何樂而不為?

今次寶勝私有化呢一着,充分反映台灣人唔單止係做生意高手,而且仲係計數天才。

麥狄文(徐狄怡.證監會持牌人)

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads