熱門:

2018年1月17日

麥狄文 金融街密語

中美資金戰成就港股狂牛派對

好打得嘅特首林鄭,去年跟馬雲首次會面後,上周林鄭又再度跟呢位言行出位嘅企業家會面,講嚟講去都係想邀請馬雲嘅阿里巴巴,或者旗下及關聯公司嚟香港上市。而馬雲都相當識做,除咗表示會考慮旗下公司嚟香港上市之外,仲大讚浙江人都睇港劇長大,從中學習好多企業家精神,先會有今日嘅浙商。

出動到林鄭力邀阿里巴巴回流港股,令阿Man聯想到,港交所(00388)改例遷就同股不同權公司,吸引新經濟股赴港上市,並唔係香港政府或港交所本身意願,而係阿爺嘅意思;目的得一個,就係要透過港股呢個平台,盡吸全球資金。

阿爺出錢出力 林鄭做說客

由於美國已通過侵侵嘅稅改方案,而目前美國公司停泊喺世界各地嘅數以萬億計美元,預計稅改通過後,可能誘導美國企業將約三分之二嘅海外資金調回美國,即係呢條數至少都過萬億美元。而呢一次美國稅改將引發全球資金戰,當中最有條件跟美國拗手瓜,盲搶資金池內有限資金嘅國家,當然係強國崛起嘅中國。由於今年全球央行開始收水,全球資金池將會由之前無限量增加、你印我又印嘅情況,轉變為咁多就係咁多,美國利用稅改誘使資金回流;中國則利用港股搏命吸金,實行搶得幾多得幾多。

自從舊年騰訊(00700)分拆閱文集團(00772)上市,掀起新經濟股認購熱潮後,今年有望再迎來內地直播電競平台鬥魚。較早前有消息指由騰訊參投嘅鬥魚,今年內將來港上市,集資額3億至4億美元。

當然區區二三十億集資額,鬥魚並唔係今年上市重頭戲,不過鬥魚極有可能跟平保(02318)旗下將分拆、估值逾200億美元、集資額或高達50億美元嘅陸金所,有望成為香港首批同股不同權嘅新經濟上市公司。

除咗上述呢兩間公司,仲有市值或達萬億元嘅小米、阿里巴巴旗下嘅螞蟻金服,仲有去年12月初出席烏鎮飯局嘅內地科企巨頭,預計超過50家內地新經濟公司,都會成為港交所招攬對象。

試想想上述多家新經濟企業來港上市,不僅令港股市值壯大,最重要係吸盡全球投資者嘅資金;而本來有意回流美國嘅資金,唔排除會畀呢堆新經濟股上市嘅投資機會所吸引,轉資金調到香港市場。阿爺並唔係得把口話支持,除咗叫小加同志改制配合之外,仲出錢又出力,一方面搵好打得嘅特首做說客,另一方面透過內地企業出錢投資,以爭取重量級企業來港上市,以吸取全球資金。聽聞史上最大規模IPO沙地阿美,為咗成功爭取來港上市,有中資企業將斥巨資入股,作為沙地阿美來港上市條件。而沙地阿美估值高達2萬億美元,折合超過15萬億港元,而港股目前市值約35萬億港元,即係沙地阿美一旦落戶港股,香港市值可即時暴漲四成,至50萬億港元。

新經濟股加阿美料吸金萬億

再計一計上述公司嘅總集資額,單係沙地阿美集資額估計已達1000億美元,折合港幣7800億港元,而去年港交所IPO集資額跌至全球第四,相當失威,只有約1300億港元。若然今年成功爭取沙地阿美落戶港股,以及上述一眾新經濟股,港交所豈止能重奪全球最大IPO集資額交易所,新股吸金可近萬億元,港股將成為中國跟美國鬥法吸資金嘅一個前鋒;而呢場資金戰亦將造就港股大開狂牛派對,試問IPO集資額高達萬億元,市場氣氛唔夠熾熱,又點吸引資金入場。

麥狄文(徐狄怡.證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads