熱門:

2017年12月27日

畢老林 投資者日記

唔夠儍賺唔到錢

12月26日,周二。2017年進入倒數階段,雖云黑起上嚟窮剩自己,但無可否認今年資產市場大旺,香港股樓唔在講,歐美日以至新興股市全皆錄得兩成以上漲幅。回顧歷史,美股標普500指數、MSCI歐洲及MSCI太平洋指數同一年回報齊逾20%,1970年以來只發生過五次,分別為1975、1983、1985、2003和2009年;換句話說,2017年乃48年來第六次。

順帶一提,2017年買股買樓買REITs甚至買金都有錢賺,但怎也及不上賭波動性持續受遏賺得咁誇張。唔計Bitcoin等虛擬貨幣,short volatility毫無疑問是Trade of the Year。這個策略執行起來亦好簡單,買入跟「恐慌指數」VIX背道而馳的美國上市ETF(VelocityShares Daily Inverse VIX,代號XIV),年初以來回報唔係兩成而係兩倍;計埋2016年獲利八成,XIV兩年累計漲逾四倍【圖】!

明年有冇咁好環境?

XIV屬反向ETF產品,而且名稱中有Daily字眼,即係只宜短炒,仲要係唔坐過夜嗰隻,識計數點會揸足兩年?唔理三七二十一反而有運行,皆因冇波動性嘅唔單止美股,隻ETF本身亦好穩定,非但沒出現這類產品易被「陰乾」的情況,反而食正美股穩步上揚、VIX愈潛愈深個勢,short volatility單邊賺到笑。明年仲有冇咁好環境?這就好像問香港樓價仲有冇得去、美股到頂未一樣,想要理性答案不如不問,只因今時今日唔夠儍賺唔到錢。

一年將盡,芬佬要搏殺都留番明年。不過,知道此輩最新意向冇壞。根據美銀美林最新(12月)全球基金經理調查結果,long Bitcoin是芬佬眼中第一大「擁擠交易」(the most crowded trade)。

好多人都把擁擠交易當作相反指標來用,咁即係話,目前市場上最多人做嘅係long Bitcoin,講到咁crowded,對着幹自然要short,比特幣已有期貨,坐言起行不難。可是,老畢聽咗當冇聽,皆因受訪芬佬有幾多真係參與,甚至准唔准參與Bitcoin買賣都成問題。互惠基金資產配置設有規限,唔係想投資什麼便能投資什麼。如果連買都唔畀買,大大聲話Bitcoin呢樣嗰樣,冇意思兼冇意義。

唔係齋talk值得尊重

這就好比抄一大堆資料,大談邊隻邊隻虛擬貨幣跑贏Bitcoin成條街,閱讀價值唔係冇,但老畢最有興趣知道嘅係寫嗰位有冇買,因為這樣才有考慮跟或不跟的基礎。有錢擺落去完全唔同,bias少不免,贏輸亦話唔埋,但只要唔係齋talk就值得尊重。

接受美銀美林訪問班芬佬一樣,受條例所限不得涉足虛擬貨幣,話之Bitcoin升到上天,冇人會怪基金經理錯失賺大錢機會。你冇對手一樣冇,其他人拉唔走你班客。科網泡沫就唔同,未爆而你唔參與,隨時連份工都冇埋。強如老虎基金創辦人羅伯遜(Julian Robertson),當年都係因為太過理性,搞到投資者拉大隊走人,煲未爆基金已摺埋,全世界錯晒得你啱,又有何用?

講同做兩回事

冇押注唱好唱淡都假,Bitcoin算不得數。班芬佬還算老實,調查顯示第二和第三擁擠交易分別為long Big Tech及short volatility。不過,講同做係兩回事,保唔住份工,噏乜都嘥氣。有幾多人明年夠膽short Big Tech同long volatility?都係踩Bitcoin最安全,唔怕炒魷也!

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads