熱門:

2017年12月12日

方卓如 方如玉帥

未來只有這條路

細價股風暴,為2017年埋尾。證監會掃清個場是好事,等2018年可以有個乾淨開始,等多啲本土企業正經做生意,反正市場對高增長企業有理想估值,你敢做得大,市場自然夠膽畀錢買你。咁均真嘅市場,使乜做賊偷公司錢?畀啲心機做好生意,夠你食過世。當然,可惜嘅係,做生意唔係香港人強項,所以我噚日講,你出豉油人出雞,先係未來香港人賺到錢嘅方法。逐間逐間好好經營,大小股東都賺到錢,未來只有這條路。

身邊愈嚟愈多人買Bitcoin,愈嚟愈多人買,其實貨源愈嚟愈乾,升得仲勁。Bitcoin futures面世,當期貨嘅交易量夠大,又可以扯高現貨價。點解唔係推冧而係扯高?因為期貨莊家唔夠貨,最多貨唔係喺華爾街手中,係喺啲戇居居嘅技術人員或早期投資者手中,佢哋3年前400蚊(美元.下同)都會覺得貴,唔知佢會獲利豐厚,但係信加密貨幣,一直揸到而家。

夠膽由頭揸Bitcoin到尾嘅人,萬中無一,仲難過揸騰訊(00700)揸5年。騰訊你都見到佢有業務,斷估佢股價唔會跌到變零,又唔會有人上門拉晒佢啲主席董事,你買咗會瞓得着覺;但係Bitcoin由一蚊都唔值,升到400蚊,對技術人員嚟講,仲唔係天文數字?

做人唔好望返轉頭

3年前買Bitcoin係好艱難,而家最勁嘅加密貨幣交易平台Gemini,2014年仲未面世。3年前要大手買Bitcoin,同而家買樓一樣,要入標。幾百蚊浮沉兩年,你呢啲醒目仔見到Bitcoin價錢咁呆滯,老早就沽晒。而家手持大量Bitcoin嘅人,一係就絕頂聰明,睇通未來;一係就笨頭笨腦,對金錢冇概念,我認為後者居多。

講咁多,係想話你知,俱往矣,做人唔好望返轉頭,唔好理年頭Bitcoin只係一千蚊,佢如果跌回一千蚊,你仲唔敢買。未來係睇上嘅話,就用你輸晒都唔肉赤嘅銀碼,買返個「扎」袋。輸錢未必令你瞓唔着,但錯過了賺錢機會你會難以入睡。什麼?唔會?錯過賺錢機會你冇感覺?你睇呢份報紙幹啥?

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads