熱門:

2017年12月11日

方卓如 方如玉帥

千帆並舉不合時宜

聽完李小加响經濟峰會演講,我明白了,最近嚴厲打擊細價股嘅行動是必需的,證監會做得很對。

香港最怕係國際化做唔成,本地化又唔掂,兩頭唔到岸。香港要成為國際市場是冇可能,你見外國公司嚟香港掛牌全部都冇好下場,由早期「納指七雄」到近期啲嘅嘉能可(00805)同淡水河谷,交投慘淡,比邪惡嘅細價股更快退市。

有正當生意、有盈利、有規模嘅國際大公司股票,香港人冇興趣買賣;反而冇生意、冇盈利、冇前景嘅殼股,香港人仲肯大炒特炒。呢場上市集資嘅資本盛宴,外資公司完全冇得參與,香港又點有本事成為國際資本市場?

你出豉油人出雞

反而全本土化就有得做。記住,本土化唔代表深圳河以南,自從九七年之後,香港是紅的,本土是要包括埋「中國本土」,只係講香港本土,就冇國家意識。

本土資本市場包括上海深圳香港,但資金最流動嘅,係香港呢個本土市場。多啲騰訊(00700)呢啲「本土企業」在香港上市,引全世界嘅資金嚟炒,咁香港嘅價值就最明顯。

如果第時人民幣可以自由兌換,香港會唔會瓜柴?咁就要睇到時香港適唔適合人住。股票市場看似沒有地域限制,但其實係好地域性嘅市場,隔山買牛係好專業嘅行為,你都唔知淡水河谷究竟係來自邊個國家。

只要香港仍然係中國最宜居嘅城市,香港市場就唔會枯死,前提係玩法要似A股,咁就唔會出現退市回歸A股嘅現象。香港正係朝着呢個方向進發,入嚟香港做香港人又愈嚟愈多,香港呢個本土市場,肯定愈嚟愈旺。仲有,香港嘅樓只會愈嚟愈貴,咁多人嚟同你爭。

香港出生嘅香港人,可以點參與本土市場?做殼會攔你,做賊會拉你,做生意蝕死你,唯一出路,可能係你出豉油人出雞,泊個大碼頭做盤大生意,你就坐順風車賺一筆。當然,出豉油都要有咁上下本事,否則點豉油都點乾你。呢種模式過去幾年行之有效,只係你唔可以做得太多隻,唔會有咁多大碼頭同一時間開波。反正大集團式幾十隻殼千帆並舉已經不合時宜,逐隻逐隻好好經營,係而家唯一途徑,香港出世嘅香港人仲可以參與本土市場,但要快,你睇騰訊都係自己分拆隻閱文,唔係借殼上市,證明「本土企業」開始識玩呢個遊戲,唔使靠你香港「原居民」。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads