熱門:

2017年12月7日

方卓如 方如玉帥

只係香港出世嘅人窮

恒生指數收報28224點,跌618點,成交1626億。12月只係用咗4日時間,就將11月全部升幅一筆勾消,回到10月底嘅水平。過去11個月,每次有啲顯著跌幅,即刻有人買上,唔使兩日就收復失地。惟過去4個交易日,唔見有人出嚟買平貨,證明平貨未必平,貨平亦未必係買入嘅理由,因為明天可以更平。

反而Bitcoin就長升長有,已經係10萬元一粒。因為Bitcoin可以任意拆細,購買小數點後8個位,所以天價數字嘅Bitcoin,入場費都可以豐儉由人。問題係,點解有實質生意又會派息嘅股票要跌,反而冇乜實際用途,投機到極點,泡沫到驚人,華爾街稱為騙局嘅Bitcoin,反而價錢上升?380年前嘅鬱金香泡沫,民智未開,人買我買;380年後嘅今日,資訊透明,人人識字,全世界大學畢業生多過380年前嘅歐洲人口,泡沫可以捱到一年都唔爆,你應該懷疑呢啖泡沫其實相當堅實。好多事情可以騙人,但市場唔會騙人。

Bitcoin市值接近騰訊(00700)嘅一半,你覺得有冇人可以操控半隻騰訊?股票跌而Bitcoin升,這點就值得你花上輸清唔會瞓唔着嘅金錢,投入去博一博。有時候錯過了的機會,更加令人瞓唔着。同Bitcoin一樣持續上升嘅,係樓市。年頭叫你小心唔好買樓嘅,而家年尾問吓佢有乜嘢可以講?而家買樓嘅,大部分係香港人,只不過佢哋未必喺香港出世,廣東話都講得唔正,但係都有三粒星身份證。

樓市九七後是紅的

你話香港樓價同人工脫節?呢班香港人唔係靠份人工開飯。如果用人工嚟衡量,呢班人係貧窮線樓下,要政府接濟。但論可調動資金,就買得起天匯同Mount Nicholson;窮一點嘅,就趁攞咗香港身份證之後,買間海之戀畀個女。學者仲用以前人工佔供樓比例去評價樓市,正正係王振民所講,都唔知九七年之後香港就是紅的,唔肯接受香港係共產黨領導。黨要你人口調動,拆屋又得,買屋又得。香港是紅的,房屋自然是紅的。香港出世嘅人買唔起樓,who cares?其他香港人買得起。香港人其實好有錢,只係香港出世嘅人窮,明冇?

而家諗嘢,千祈唔好從正路出發,因為以前嘅正路,時移世易,已經行唔通。太慢拋低以前學嘅一套,你就唔夠快去接通而家嘅新一套。記住,有錢就買樓,閒錢買Bitcoin,香港是紅的。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads