熱門:

2017年11月24日

方卓如 方如玉帥

仁慈嘅獨裁最有效率

「方帥,好耐冇見你。上次你話揸電單車去西藏,唔見你講多啲俾人聽嘅?」

「草蜢仔,估唔到你一見到我唔問吓我三萬點有冇賺錢,反而問我去西藏?後生仔竟然唔係滿腦金錢,而係一心追求靈性,真係估你唔到,唔知讚你好還是教訓你好。

「西藏梗係無得頂啦,一生人點都要去一次。可以揸電單車去更加係夫復何求。踩單車略嫌太辛苦,我用一個鐘頭上東達山,踩單車要兩日,點捱?揸四個轆亦唔見得安全過電單車好多,在懸崖遇上冇迫力嘅大貨車,電單車有路走,四個轆只有跌落懸崖,都唔使講其他塞車封山缺氧失救的過往實例。今次仲好彩冇落雨,日日藍天白雲,路況穩定,飛車狂飆入拉薩,人生冇幾多呢啲機會。」

「嘩,咁精采?沿路係咪冇啖好食?」

「香港人,去邊都諗住食。探險旅程,一切從簡,但途中唔少靚酒店,豪華嘅可以靚到嚇死你,當然簡陋嘅都有。旅客住嘅可以唔太差,但當地人有啲生活條件的確麻麻,尤其是廁所。所以我好佩服女仔走去踩單車或坐車從川藏線入拉薩,膽小啲嘅都暈低。淨係睇呢樣,習帝話要响2020年全面建成小康社會,仲要好大努力,冇理由小康社會生活嘅人要踎响徙置區式廁所。去過川藏線走一趟,你就相信,呢刻中國人最需要嘅唔係自由投票,係生活質素。好不幸,民主選舉唔保證生活質素,你睇肯尼亞同津巴布韋,仁慈嘅獨裁先係最有效率改善社會生活質素。至於中國係咪仁慈嘅獨裁,唔知,就睇吓2020年嘅川藏線係咪全面建成了小康社會。」

「方帥,人哋遊山玩水,你竟然諗埋啲無謂嘢,唔怪得你頭髮白得咁快。我都係專心走去炒股票,趁市旺贏多兩趟,攞錢走去買樓。」

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads