2017年11月23日
2017年唔單止唔係逢七必災,仲係大大大牛市嘅一年,由頭升到尾。今年搵大錢嘅方法,原來係由年頭一直揸大價股揸到尾;揸期指贏錢再冧落去加碼;藍籌被沽空機構狙擊,股價下挫乘機撈底加倉,不過我好肯定今年冇人發達。
10年前衝上30000點,我親眼目睹有三種人發達。
第一種由港股直通車傳言一吹嘅時候,揸期指,一路贏一路加碼,兩個月就變咗另一個人,再借錢買隻殼,實行發上發。
第二種係衝上30000點之際,手上嘅垃圾股升咗20倍,晉身過億身家,跟住就發揚光大。
最後一種,係金融海嘯沽期指,唔信佢跌少少就收料,一直沽到尾,咁又變成小富。
三種人我親眼目睹,有啲收山玩樂, 有啲繼續搵錢,有啲已經作古。但係三種人畀佢哋換轉時空,放在2017年,任憑佢哋智慧膽識過人,都冇辦法由年頭揸期指揸到尾,亦冇可能畀佢哋有位沽期指賺錢,垃圾股要升一倍都難,升到都冇可能沽到。點解升咗成年而家港交所(00388)先升?點解成交最叻都只係千五億?係因為要到今個月大家先至真正亢奮,好似突然間瞓醒,竟然到而家先覺得股票買得過,但係已經升到30000點。
騰訊(00700)股價可以直線上升係因為有盈利增長配合。冇單一過半大股東嘅股票,就算佢唔派息,股價都可以有支持,因為如果盈利是真,代表公司資源豐厚,股票夠平,買晒佢都有着數。但係有過半單一大股東,你永遠唔夠佢多股票,你係冇辦法動公司分毫。升到30000點是否可以繼續,的確要睇股票是否有足夠盈利增長能力。否則,始終敵唔過地心吸力。除咗騰訊之外,你搵唔搵到多幾隻股票可以大踏步增長?冇嘅話,30000點仲可唔可以向前行?咁多散戶同北水而家肯入市,仲唔係大戶最佳散水時間?
訂戶登入
下一篇: | 人有自由意志 |
上一篇: | 「滬港通」及「深港通」上日收市統計 |