2017年11月20日
騰訊(00700)究竟係唔係中國版嘅蘋果?騰訊業績可以一直保持高增長,仲有分拆概念刺激股價,市值繼續上升是常識吧。200蚊你唔信,300蚊你唔信,到400蚊唔到你唔信。
400蚊大家先開始入市,正正係牛市三期嘅特徵,散戶開始忍唔住手,高價摸頂買貨。由「新經濟三寶」引起的瘋狂抽股,抽唔到股票嘅散戶,啲錢係唔會放番落袋,會四圍走去買嘢。如果大市要回,首要條件是要有大量散戶入場的話,而家就開始具備呢個條件。
散戶開始忍唔住手買股票,但卻開始忍得住手唔盲目買樓。最近新盤開售,已經冇咗幾個月前排長龍、要貨唔要錢嘅震撼場面,原因好大程度係發展商高價開盤,實行要一鋪賺盡。長沙灣地王開標嘅價錢已經見到,全部一線發展商都係以賺盡一分一毫為目標,就算提高啲地價都只係賺少啲,毫無風險,都寧願投唔到地亦唔願意益政府。高價惜售係未來發展商賣樓嘅策略,因為睇死你平民百姓冇發展商幫手賒數,大部分人係唔夠首期買樓。
由此可見,政府係唔識樓市,政府只會愈做愈令市民無法置業。按揭成數定得咁低,美其名係要保護金融穩定,樓市下跌都唔會衝擊銀行,問題係,就算1997年起6年,樓價長期下跌,負資產數目以十萬計,都唔見有銀行倒閉。瘋癲嘅樓價銀行借五成危險啲,還是合理嘅樓價銀行借七成危險啲?合理嘅樓價,你要佢冧三成都幾困難。偏偏而家瘋癲嘅樓價,正正因為銀行只做五成按揭而造成,令到二手交易冰封,任由一手發展商mark價。但係瘋癲價格形成之後,而家又唔可以調高按揭成數,否則,大量二手成交出現,又會推冧樓價。所以,政府先係推高了樓價,然後又托住了樓價。
一手樓連劏房盤都要成千萬,呎價超過4萬元,等於400蚊嘅騰訊。貴,但係可以再貴,夠膽你就買,但千祈唔好望佢跌一半畀你入市;如果跌一半,怕你到時連開飯錢都冇。
訂戶登入
下一篇: | 年輕在職貧窮影響更深遠 |
上一篇: | 「滬港通」及「深港通」上周收市統計 |