熱門:

2017年11月8日

方卓如 方如玉帥

又多一隻紅底股

閱文(00772)今日55蚊上市,暗盤價已經超過89蚊,我話今日必定過100蚊,成為有歷史意義嘅2017年之中,永遠令人記得嘅上市新股。

坊間有唔少買賣策略,例如升四成就叫你鎖定利潤,高追小心風險,加碼入貨要睇定啲先,全部廢話。策略只有一招,千祈唔好賣,賣咗買唔番。點解?一來,你抽得唔多,我入1000手先得4手,一半機會抽多一手都唔中。

閱文唔掂大市冇運行

唔止散戶,可以配售攞貨嘅都唔夠貨,人哋滙豐私人銀行,夠巴閉喇啩,都只係分得180000股,每個客仔都唔夠一手。個個都唔夠貨,只有入紙抽一手,從無唔夠貨嘅意識,碰吓運氣賺餐飯錢,點知呢餐飯錢原來夠食鮑魚套餐,咁就一定即沽賺錢。否則的話,無論富戶定基金,明天策略只會再入貨,肯定唔賣。

點解?因為太多人錯過了騰訊(00700),個個揼到大髀內側瘀晒,悔恨自己唔夠薑, 騰訊唔敢愈貴愈買。閱文正好可以彌補呢種悔恨嘅良藥,買唔到或者買唔夠騰訊,轉買閱文。你唔會見到閱文變番上市價55蚊,正如你唔會見番騰訊回到當年上市3個7。另外,基金要跑贏大市,未問識唔識揀股,最緊要先問買得夠唔夠騰訊。

礙於mandate,就算基金睇中騰訊,明知佢跑贏大市,都唔可以瞓身盡買。今次騰訊出現分身,基金經理開心到震,即係可以用雙份錢買落去。2017年個個賺錢賺得咁勁,2018年點追?閱文嘅出現,令佢哋有機會2018年交到功課。今天想買嘅人一定多過想賣嘅人,他朝連「港股通」都買得,大把人加入一齊再買。

我知,你會問,如果再買,幾時落車?買貨容易落車難,會唔會好似眾安(06060)高位接貨,而家捱價?捱價唔緊要,怕唔怕有日要落車冇人通知?閱文相信唔怕唔識落車,因為佢股價唔掂之日,必定係大市同樣唔掂之時。大市唔掂大家要走鬼,你唔會唔知啩?科技股係支持2017年大升市嘅火車頭,閱文都唔掂,大市都冇運行。今日策略,唔使多講,瞇埋眼買,要走嘅時候自然通街大大聲話你知。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads