熱門:

2017年11月3日

方卓如 方如玉帥

舉腳贊成強積金買樓

長實(01113)高價賣出中環中心,證明香港始終係地產最賺錢。你唔好睇賣嗰個,應該睇買嗰班。有四成半嘅資金由一班本地投資者參與。呢班香港人,個個都係炒地產發達,個腦計數肯定係天才兒童級數,願意夾錢買,絕對唔係應酬畀面,係見到400億買返嚟都有錢賺。佢哋每人夾幾億,如果冇錢賺,不如自己用幾億買樓買舖,又或者夾錢買領展(00823)商場?咁多人肯一齊出錢泊車,肯定係無寶不落。中區寫字樓,以至長沙灣酒店地皮,愈買愈高價,你喺香港有層樓揸手,係最容易為財富增值嘅方法。

有建議市民可以提取強積金結餘去做首置嘅首期,無論你有冇打算買樓,你都應該舉腳贊成。強積金逼每個市民供養基金公司,但係佢哋收取昂貴管理費,表現並唔好過收費特平嘅ETF。

基金經理開始成為夕陽行業,將來唔係由人工智能揀股,就係索性買晒ETF跟市場同步。買追蹤指數ETF嘅好處,就係指數公司幫你揀股。汰弱留強嘅指數,確保你買嘅追蹤指數基金,一定係買啲當紅股票。雖然,未必可以識於微時,在未爆發前就買入股票,好似南非Naspers買中騰訊(00700),咁就母憑子貴。但係ETF幾乎係立於不敗之地,連ETF都輸,市場好難搵到人贏。簡單講,強積金係蠶食你財富嘅隱形殺手。

樓價唔升 至少賺住

用強積金買樓,過去10年嘅比較,回報一定比你放在任何強積金投資組合高。哪怕你選擇進取形組合,你有乜可能跑贏有槓桿嘅樓市?就算基金經理神機妙算睇中騰訊,佢受mandate所限,都唔可以一注獨贏。唔借得又唔可以將雞蛋放晒一個籃,冇一個基金可以幫你賺到盡。反而買樓,就算10年後原地踏步冇得升,你都賺咗住,交少10年租。用強積金買樓,香港人未諗賺,至少輸少啲。

只係強積金可以用於首置會有後遺症。基金公司唔少人要失業,夕陽行業加快走入夕陽;政府可能乘機加供款額,要打工仔更少錢使,成世為層樓打工;中小企被迫增加供款,惟有叫員工化身自僱人士,到時候香港遍地初創企業。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads