熱門:

2017年10月24日

方卓如 方如玉帥

Hi tech唔再揩嘢

恒生指數收報28305點,跌181點,成交913億。人類覺得而家市況好難捕捉,唔易贏錢,人工智能會點諗?人工智能操盤嘅ETF、AIEQ,開檔兩日已經跑贏標普500指數,證明就算大市冇乜確實方向,唔使扑中隻爆升股,都一樣搵到食。反而人類就拘泥於大市仲有冇力上升,會唔會位高勢危,坐喺度等冧市。人工智能炒股票,人類最聰明嘅做法,就係偷睇人工智能買乜嘢,然後跟住買。AIEQ有公布購入股票持股量,有興趣嘅自己可以捉吓盤路,睇吓你係咪可以好似柯潔咁,能夠從人工智能身上提升自己功力。

Bloomberg分析華爾街邊幾樣工種會受人工智能影響,麥肯錫又有出報告探討華爾街前中後枱邊張最受影響。但各方結論都係,人工最厚、智力要求最高嘅工作,未來5年減三成在所難免。咁而家嘅後生仔讀咁多書做乜?開發人工智能只係需要幾十人團隊,每年全世界過百萬大學畢業生,讀完書仲有乜嘢路數?反而嗰啲讀唔成書,日日掛住打機嘅廢青,打得叻加入電競隊,隨時殺出條血路受萬人景仰。

所以而家教仔,唔可以成日叫佢讀書,反而要畀佢盡情玩,玩到有一瓣成精,咁仲有機會出人頭地,哪怕佢玩嘅係打機定腹語,只要佢肯擺時間認真玩,咁你就安樂晒。

閱文準備上市,預計反應比眾安更熱烈。2017年同1997年都係影響香港人思維嘅一年,1997年係令香港人知道樓價沒有永遠上升,叫而家任何一個買樓嘅人都問自己怕唔怕樓價跌,又叫任何一個等緊買樓嘅人有信心等;2017年,香港人終於醒覺hi tech未必揩嘢,hi tech原來都可以撈嘢,開始信科技股係真。以後任何想炒嘅股票,如果冇啲似樣嘅科技元素,好難炒。香港最成功嘅本土科技股係乜嘢?GoGoVan?有時候科技都唔係一定要先進到識炒股票先係達標,簡單地幫到人類生活改善已經有價值。

你窮一世精力都唔會諗到點樣利用機器炒股票,但係用手機程式收集文章同訂車送貨,怕且都係思考能力範圍。趁你仲有思考空間,快啲諗啲hi tech嘢,在機器取代你之前撈番筆。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads