熱門:

2017年10月23日

高仁 財圈識真假

大「蠱」東大挪移偷錢過程

上文提要:「豬朋狗友」戴Sir與程更計看到高仁的文章之後,就邀約高仁一起飯局,並從討論上市公司開拓「新」業務引發股價上升的過程中,發現大「蠱」東偷錢的升級秘技。正所謂「騙徒手法層出不窮」,上市公司大「蠱」東的偷錢手法,更可以說是無出其右。本文,高仁、戴Sir與程更計的飯局進行到下半部,將揭開大「蠱」東的大挪移偷錢法。

在披露對話實錄之前,請各位「巴打」與「絲打」重溫人物背景,簡介如下:

戴孤劃──又稱為「戴Sir」,《信報》「蠱壇辨虛實」專欄作家,上市公司大股東,經常欺壓小股東。

程更計──本地證券行經紀兼財務顧問,除了招呼散戶之外,亦向上市公司出謀獻計。

高 仁: 大挪移!?莫非係我偶像金庸筆下張無忌嘅「乾坤大挪移」心法?

程更計: 差唔多。上市公司透過一連串corporate actions(企業行動),包括內部資產重組、派發特別股息、實物分派及換股要約,可能達到大「蠱」東大挪移偷「錢」嘅目的。

戴孤劃: 好似幾複雜咁,快啲講嚟聽吓。

高 仁: 哦!原來你講緊嗰間本港上市公司A,A公司本身持有外國上市公司B,B公司則揸住兩件貴重資產C同D,大「蠱」東對呢兩件資產虎視眈眈。

空手入白刃攞重要資產

程更計: 冇錯。首先,A公司建議斥巨資收購B公司所揸住嘅資產C,務求由間接持有變成直接持有資產C,但先決條件係B公司要派發接近相同金額的特別股息。

戴孤劃: 嘩!咁即係A公司空手入白刃攞走B公司嘅資產C啦!

高 仁: 戴Sir,你唔使咁興奮住,另一件重要資產D都仲未講。

程更計: 跟住,A公司建議以實物形式分派B公司嘅股份,即係A公司全體股東做埋B公司嘅股東,而A公司又建議派發特別股息。

戴孤劃: 驟眼望落去,A公司對小股東都不薄,既派獎金又派獎品。

高 仁: 戴Sir,呢啲獎金同獎品只係甜頭嚟咋,試諗吓,B公司喺外國上市,名副其實隔山買牛,小股東都唔知點樣做trade,大多數都唔願意揸住B公司股票;所以,大「蠱」東幫小股東諗埋,建議利用佢嘅A公司部分持股,要約交換小股東嘅B公司股票。

程更計: 最攞命之處係,大「蠱」東所訂立嘅要約換股比例,雖然按獨立第三方估值去釐定,但係偏向favour大「蠱」東嘅interest。

高 仁: 一方面,A公司空手入白刃攞到資產C,大「蠱」東嘅實際權益可能增加;另一方面,大「蠱」東要約換股低買高賣股票,既可以變相偷錢,又可以攞到資產D。

戴孤劃: 呢招大「蠱」東大挪移偷錢法,果然係正喎!

大「蠱」東有大挪移偷錢法,上市公司亦可能會「出千」,市場監管機構會以什麼方法制止呢?下周,高仁會向各位「巴打」解說。

大「蠱」東偷錢秘技系列.之三

本欄逢周一刊出

歡迎交流上市公司的財技個案及招數,請電郵至 [email protected]

 

放大圖片 / 顯示原圖

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads