2017年10月19日
閱文上市,騰訊(00700)股東有優先認購權。眾安(06060)在前,閱文會唔會有同樣爆發力?呢個係一個炒股票最佳教材。眾安有一個特殊炒股票嘅背景:三馬係股東,有七成以上係內資股,流通可以响香港買賣嘅係有限數。話雖如此,就算供應再少,冇人肯炒,股價唔一定要升。眾安仍在蝕錢,冇數可計,你信就信,唔好講什麼P⁄E。做保險行業,利潤波幅可以好大,大賺大蝕都得,冇任何生產力樽頸。炒股票就係要炒啲任你演繹,冇任何客觀數字限制你嘅幻想。眾安具備炒作條件,但邊個肯落本錢炒就外界唔會知,所以散戶69蚊就走鬼,享受唔到炒上96蚊嘅甜頭。
閱文唔同,股東主要係騰訊股東,冇話邊個係控股股東唔沽得,供應係全數股票。閱文賺錢,有數得計,貴定唔貴,有客觀標準。最要命嘅係,騰訊大家唔捨得沽,分拆之後,要套現食糊嘅騰訊股東,最理想嘅就係一邊沽閱文攞錢,一邊留番騰訊等升值。但好處係炒開騰訊嘅一班,係潛在大戶肯落場炒隻細啲晒士嘅閱文。
不過,都係嗰句,有數得計,邊個炒高就益咗人哋沽貨,如果你問我,必定眾安多人肯炒過隻閱文。
十九大變咗全世界焦點,原因係美國開始同全世界反枱,中國就出嚟領導全世界。美國內部開始四分五裂,中國就完成權力超級集中。《經濟學人》話習大大係全世界權力最大嘅人,代替咗美國總統。年輕人有理想有熱血係正確,但都要盡快認清自己處於什麼環境、什麼國度。認清之後都照做,父母都冇得責罵你;如果盲目去做搞到連自己都後悔,咁就死得冤枉。
過去幾年,龍門的確係搬到唔清唔楚,但搬到而家已經有足夠時間畀你捉路。十九大之後嘅香港,你只會更加覺得自己似係住喺上海。咁你嘅思維,應該要經常問自己,如果你住喺上海,你而家做嘅嘢係令你開心咗,定係令屋企人擔心咗。
訂戶登入
下一篇: | 由三代供樓到啃老族 |
上一篇: | 「滬港通」及「深港通」上日收市統計 |