熱門:

2017年10月17日

畢老林 投資者日記

慢牛下的超級大贏家

10月16日,周一。要選2017年最悶的財經標題,老畢相信「美股屢創新高」必然榜上有名。大升市而令人悶出鳥來,那肯定不是什麼melt-up,而是一頭愈老耐力愈驚人的「慢牛」。

彭博月初列舉了一系列統計數字,讓人清楚看到老牛在無風無浪中不斷創新高是怎麼回事。年初以來,標普500指數非但月月走俏,且沒有任何一個交易日上升或下跌超過2%。不太健忘的讀者大概還記得,這種風平浪靜的日子於距今不遠的2009和2011年,簡直不可思議。彭博資料顯示,在美股剛見底的2009年,標指先後55次單日升跌2%或以上,而2011年歐債危機期間則合共發生過35次。

再看單日百分率實際變動,標指年初至今平均變幅只有0.31%,如果現在就「埋數」,2017年美股日均變幅為1965年以來最小。更重要的是,標指今年出現過的最大頂至底(peak-to-trough)跌幅僅2.8%,遠低於過去100年約16%的平均數!

今時唔同往日

老牛不僅漲極唔停,且步履穩健行住嚟升,如此市況,有人快活有人愁。炒賣最忌冇波幅,難怪個市愈破頂就愈多人呻搵唔到食。波動性不知何日重臨,博均值回歸要輸,出出入入搵嘢嚟搞,而以賭徒心態死都唔信第11鋪仲係開大,結果衰多次,反而瞌埋眼買指數基金乜都唔理,比自以為識計數之輩更能食正慢牛個勢。

昔日常有炒家利用「百年一遇」事件賭單邊博吃大茶飯,但經過去年英國脫歐和美國大選兩隻所謂「黑天鵝」,此輩發現今時唔同往日,在市場上面對的不再是識驚怕死有血有肉的投資大眾,而是不會受情緒支配的algorithms。程式唔同人,錯過一兩次機會不會呼天搶地,高追又唔怕摸頂,買買賣賣皆按預設指示進行。以往睇準時機起筷例必贏到開巷的大炒家,如今冇兩下就畀班「機械人」挾個三魂唔見七魄,哪裏還敢落重注賭方向?

一次係咁兩次係咁,尋常散戶都畀個市train到唔多識驚。他們不一定自己揸鑊鏟炒,但從資金不斷由主動型基金流向被動型ETF可見,慢牛當道該如何投資,老散早就唔使人教。

老散唔使人教

知道趨勢只是第一步,如何利用客觀環境替個人財富增值才是重點。老畢冇幾耐前看過報道,得悉全球最大理財集團貝萊德(BlackRock)【圖】資產管理規模(AUM)去年突破5萬億美元,但CEO芬克(Larry Fink)上周向CNBC透露,集團最新AUM已接近6萬億美元,即唔夠一年再激增萬億美元。大基數下增長兩成,認真唔講得笑,當中最大功臣自然是旗下ETF品牌安碩(iShares)。

資產管理唔同一般生意,其他行業要發大嚟做,器材要加人手要加,意味資本投放和營運開支必然相應上升。計落條數,錢係賺多咗,惟邊際利潤極有可能不進反退。資產管理就唔同,流入資金多10倍,不等於營運商要按比例增添人手和投資,但管理費收入一定會按比例大增,名副其實scalable。

有幾好賺?數據顯示,美國有180餘家上市公司被歸類為「資產管理及託管銀行」(asset management & custody banks),當中最大20家的純利率(net profit margin)平均高達28%,遠勝標指成分股10%至11%的平均數。

大勢所趨押一注

被動型投資已是大勢所趨,大家若嫌齋買指數基金太悶,不妨考慮押注能直接受惠於這個趨勢的資產管理公司,貝萊德外還有SPDR發行商道富(State Street),以至規模較小惟增長迅速的WisdomTree。歸根結柢,此等OPM才是慢牛下的超級大贏家!

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads