2017年10月13日
10月12日,周四。提過有位同事仔,年中成為美國科技股投資新人,但完全沒有beginner's luck,選中Alphabet,買後不到一個月,股價就因為歐盟天價罰單而大跌。儘管出師不利,但同事仔氣定神閒,心情依舊咁靚。
不少投資者日日留意股價,同事仔對短期波動好像不太在意,對公司業務前景反而十分關注。佢同我講,據估計,數碼廣告市場未來幾年將保持高速增長,一來廣告市場整個餅會變得更大,二來電子媒體會進一步搶走傳統媒體生意,同時亦會吸引到一批以往無法負擔傳統媒體廣告開支的中小型客戶。數碼廣告市場主要由Google與Facebook瓜分,沒跡象顯示未來幾年情況會唔一樣。歐盟罰款或類似的一次性事件,不應動搖投資者對Alphabet的正面看法。
招兵買馬
同事仔接着說,當初選擇Alphabet,一半因為自己乃鐵粉。公司有七樣產品,各自擁有過10億用戶,包括Gmail、Andriod、Chrome、Google Play、YouTube、Google Search,以及Google Map,世上有多少公司能擺出這等陣容?
近期發展亦不乏好事,之前Google Express一直未有大突破,但未來與沃爾瑪聯手,顧客可透過Google智能音箱以話音購物,同事仔相信對業務多多少少有幫助。報道指Google在內地招兵買馬,正準備建立一個人工智能研究團隊,可能是公司重返中國的先兆,雖然只屬傳聞,但可能性不容抹殺。
收購HTC代工業務則有助Google自家品牌Pixel手機發展,雖然要挑戰iPhone爭取高端客戶冇咁易,但Google開拓硬件市場亦非毫無勝算。9月在印度開展的電子錢包業務Tez,做得好說不定就此開啟廣告以外另一門大生意。同事仔如數家珍,講到眉飛色舞欲罷不能,老畢繼續聽下去。
估值合理
主業以外,Other Bets可以看成一袋神秘禮品。具體業務狀況資料有限,但當中包括多個範疇的新科技,最廣為人知應數自動車項目及研發AlphaGo的Deep Mind,其他還有生物科技、醫療、機械人等。旗下CapitalG亦透過投資一大堆不同新經濟公司,包括Airbnb等,為集團尋找增長點。不單作為金主,CapitalG亦會借力Google在軟件工程、推廣、銷售與營運多方面的專業知識,幫手湊大泵錢入去的公司。
大吉利是
估值方面,以目前20%以上的增長速度,明年每股賺40美元並非難事,二三十倍P⁄E毫不過分,特別是作為一家科技巨企,手上主業盈利能力極強,而處於投資期的各個Other Bets項目,隨便跑出一個都唔得了。
後生仔即係後生仔,未曾經歷大風浪,凡事總往好的方面睇。美國科技股年中雖有過一次比較像樣的調整,但絕非洗倉式狂瀉,大吉利是一個巨浪冚埋嚟,同事仔會唔會陣腳大亂走夾唔唞,未發生話唔埋。不過,肯踏出第一步,出師不利冇影響士氣;愛股近日回勇,估計已收復失地,亦不覺他如何興奮,投資EQ算唔錯。但願佢講嘅一一兌現,風雨不改揸到退休。
放大圖片 / 顯示原圖 放大圖片 / 顯示原圖
訂戶登入
下一篇: | 大市現疲態 消費股跑贏 |
上一篇: | 香港股市上日收市統計 |